NRC dak sendakba nung telok kati Rajnath Singh den ajuruteptsü

Silchar, Metsüremi 27 (Agencies): National Register of Citizens (NRC) atema kibong tera bushiba mapang nung Barak Valley nung alirtem mezüngmeshia amshiba dak sendakba nung parnok nisung troki Rasemnü Union home minister Rajnath Singh den New Delhi nung ajuruteptsü.
Parnok trok rongnung Citizens Rights Protection Co-Ordination Committee, Assam, aser Human Rights Awareness Organisation, Calcutta nungi züngsemtem densema lir.
CRPCC züngsem Kishore Bhattacharjee-i ashiba agi, Barak valley nung alirtem talisa Bengali Hindu nungertem parnok kibong tera jangjashiba inyakyim nung kanga timtema arudar. “Nüburtem dang parnok tenüng jangjashitsüba atema tesem talanglangi aotsü asoshi tetuyuba agütsür, koba taintem, shirangertem aser sensakertem atema kanga tasak lir,” ta pai ashi.
Paisa ashiba agi, iba ken o ya NRC state coordinator Prateek Hajela nem metetdaktsüogo saka tang tashi nung kecha jenjang agia mali.
Maneni Barak Valley nungi applicant tem timbaka NRC first draft nung züngoksema maliba atema shisabulua bilemba Bhattacharjee-i lemsatepa liasü. “NRC nung nisung lakh 70 shi densema mali aser iba atema onok kanga shisabulua bilemer. Item rongnung Bengali Hindu nungertem shilem 60 lir. Iba ajanga mepetmesü tulu adoktsü akok,” ta paisa ashiba den parnoki Singh dang nüburtem mezüngmeshia amshiba anendaktsütsü asoshi aser Barak Valley nung aliba lisopurtem ajak NRC nung züngsemdaktsütsü asoshi ashitsü.
CRPCC mendenbuba Tapodhir Bhattacharjee-i ashiba agi, NRC update ya All Assam Students’ Union (AASU)-i amokbanger inyaker.