NRC ketdangser 4 süpokrem meshiba atema apu

Goalpara, August 9 Agencies): Brihostibarnü okadak kati NRC ketdangser pezü anogo 14 nü tepuokdak ayutsü temelaba agütsü.
Kothakuthigaon tesem nung NRC update mapa inyaker nisung pezüi nisung ka dang nungi sen meshiba atema Dhupdhara police-i apu.
Dhupdhara police station nung Nagar Ali ta ser nisung kati FIR benokba nung ajemdaker NRC mapa inyaker nisung pezüji apu.
NRC ketdangser Barasha Das-i bio metric verification agitsü atema pa sen Rs 80 meshi ta Ali-i shia lir.
Ali-i senji agütsütsü memulung aser idangji NRC mapa inyaker Karuna Biswas, Mrinal Kalita aser Soriful Hasan nungertemi pa den raratep. Iba osang ya nisung kari Dhupdhara police nem sangoktsüba sülen parnok NRC centre-i ao aser tensaji azüok.
Iba sülen FIR benokba nung ajemdaker NRC mapa inyaker 4 ji apu.
NRC ketdangsertemi mapa inyakertem dang sen sarudena aliba meyipa agütsütsü aser verification mapa angati inyaktsü tetuyuba agütsüogo.
“Onoki bushisüngdanga aodang Das-i verification atema arur nisung shia dang nungi Rs 80 meshi ta bushitetogo” ta police ketdangser kati ashi.