NRC nung mezüngokertem dak tashiyim mamshitsü tetuyuba agütsü

Guwahati, Chiteni/July 31 (Agencies): Supreme Court-i Sangtennü Centre nem Assam, National Register of Citizens (NRC) tatembangbuba draft sangdongba nung medensemer parnok lakh 40 dak tashiyim kecha minyaktsü asoshi tetuyuba agütsüogo.
Linük nung okadak rongnung temaba ajanga Union government dang NRC nung mezüngokertem tebilemtsü aser tashishiba tem timi ochishia angadangtsü asoshi inyakyim tapet ka latettsü atema tetuyuba agütsüogo.
Justices Ranjan Gogoi aser RF Nariman nati kümtetba bench ka ajanga Centre dang NRC nung mezüngoksertem dak sendakba ken o tem angadangtsü asoshi inyakyim tapet ka lateter SC nem Lorui/Aug 16 matong tsüngda agütsütsü asoshi tetuyuba agütsüogo.
Kasa mapang nung Assam NRC state coordinator-i SC dang, tatembangbuba draft nung mezüngoksemer parnok lakh 40 rongnung parnok lakh 37.59 indang tenüng magizük aser parnok lakh 2.48 tenüng asadangshitsü asoshi agizüka yua lir, ta metetdaktsü.
NRC tatembangbuba draft ya Tentonü sangdonga liasü. NRC sangdong ajanga ashiba agi, applicant crore 3.29 rongnungi parnok 2.89 lisopur ta jangjaogo.
Ken o ashishiba maparen Lorui/Aug 30 nü nungi tenzüka Rongjui/Sept 28 tashi agitsü.
NRC coordinator, Sailesh shibai NRC tatembangbuba draft Tentonü Guwahati nung sangdonga liasü pai ashiba agi, “iba ya tatembangbuba list masü saka tatembangbuba draft dang lir.Nüburtem shirnoksa iba nung züngoksema mali parnoki kuli tejangja bener arua ken o ashishitettsü aser parnok nem lenmang sadema lapoktsütsü. Chichiba India lisopurtem kecha tsübutsü nüngdak mali.”
Taoba mapangtem nung Assam-i ozüng alema Bangladesh aser linük nung tanga tesemtem nungi nisung aika senoka aitogo.