NRC update asütsü tribal party tem akhanger

Agartala, Aami (June) 12 (Agencies): Assam nung National Register of Citizens (NRC) update asüba maparen kanga sashia aoba mapang ka nung Tripura nunga tribal-based party temi state nunga NRC update asütsüba akhang tenzükogo. Parnoki 1951 küm tashi nung state-i arurtem nem dang lisopur jenjang agütsütsü asoshi akhanger.
Tripura nung tribal-base party asem; Indigenous Nationalist Party of Tripura (INPT), Indigenous People’s Front of Tripura (IPFT) aser National Conference of Tripura (NCT) puri NRC update asütsü khanga rally balala ayongzüka aka tenzükogo.
“Onoki ano Agartala nung Aami (June) 8 nü ghonda pongu mener longkak aitba sentong ka ayongzüka akatsü. Maneni iba amala mesükba sentong ka New Delhi nung Rongjui (Sept.) nung ayongzüka akatsü,” ta INPT tir Bijoy Kumar Hrangkhawl-i ashi.
Pai ashiba agi, “Longkak aitba sentong nung tanga party temi onok den longjemnera onok renema lir.Taoba mapang nung onoki IPFT aser NCT pur den longjemer longkak aitba sentong ayongzüka kaogo.”
INPT, IPFT aser NCT puria Citizenship (Amendment) Bill 2016 agintsü asoshi khangogo, koba tang Joint Parliamentary Committee (JPC) kati asadangdar.
Parnokisa lisopurtem kümzüka ayutsü asoshi state nung innerline permit benoktsü asoshi khanga arudar aser iba den Tripura Tribal Areas Autonomous District Council (TTAADC) nem tashi tali agütsütsü asoshi, tribal tem indang ali tanaben meyipa agütsütsüba aser Kokborok oshi Constitution 8th Schedule nung bendenloktsü asoshi khanga arudar.
IPFT tatong tir Ananta Debbarma-i taoba ita tatemlen ashiba agi, parnoki Khumulwng nung TTAADC headquarters densema tribal tem aliba tesemtem nung NRC pusema aser tanga takhangba kar atema rally tululu ayongzüka kaogo.
“NRC, Citizenship (Amendment) Bill 2016 aser tanga takhangba tema atema party pur taruba jenjang indang jembishinütsü asoshi senden ka yakta akatsü,” ta Debbarma-i ashi.