NRC ya Assam nungi Bengali, Biharis meindoktsü atema lir: Mamata

Howrah (West Bengal), Chiteni/July 30 (Agencies): National Register of Citizens (NRC) tatembangbuba draft nung tenüng lakh 40 züngdokba atema tebilemtsü kaa tanü West Bengal Chief Minister, Mamata Banerjee-i, India nunger sensotem ya pei lima nung refugees kümogo, ta metetdaktsü.
Laisa, NRC ya Assam state nungi Bengali nunger aser Bihari nunger meindoktsü atema asalentong yangluba mapatong ka lir, ta aitsü.
Banerjee-isa, Central sorkari vote angutsü atema politics asayar, ta aitsü.
CM, Mamata tanü Delhi-i apusoa ogo, aser lai ashiba agi, lai Union Home Minister Rajnath Singh den iba onük nung o lemteptsü, ta metetdaktsü.
Tanü West Bengal kübok Howrah nung osangbenertem den jembidang lai, “Ni party (Trinamool Congress) MP kar Assam-i yoktsü, aser nüngdak dang süra ni-a aotsü,” ta metetdaktsü.
NRC draft nung tenüng maliba nisungtem West Bengal nung jenokdaktsütsü asü? ta asüngdangba langzüdang lai, “Parnok meyong ki lir. Parnok Assam nung alir. Parnok meyipa arunüra onoki bilemdangtsü. Ajisüaka kechiba parnok aridoktsü?” ta asüngdang.
“Parnok India nunger, ajisüaka pei lima nung parnok refugees kümogo,” ta lai ashi.
Iba ya Bengali nunger aser Bihari nunger Assam nungi meindoktsü atema mapatong ka lir, ta shia lai, “Asalentong ka ajanga nisungtem sendoker. Pei linük nung nisungtem refugees kümdaktsüba atema onok tebilemtsü akar,” ta ashi.
Banerjee-isa, passports, Aadhaar aser voter cards alirtema karbo final draft nungi tenüng züngdokogo, ta ashi.
Centre sorkari kangshia nisung lakh 40 meindoktsü meranger, ta shia lai, “Iba ya tebilemtsü tulu ka lir. Internet service anentsüogo. Onoki Assam nung alirtem den tongtepratep mesüteter,” ta ashi.