NRC ya Supreme Court ketdangsüba kübok inyak: Rajnath

New Delhi, Luroi/August 03 (Agencies): Assam nung National Registry of Citizens (NRC) report aitsürtem aija tanü Union Home Minister, Rajnath Singh-i opposition party temi tamendakdak makai aitsüba ya tia maka, ta ashi.
Yashi Silchar airport nung Trinamool Congress (TMC) nungi teshimtet lenirtem pua ayuba dak sendakba nung tanü Parliament nung Trinamool Congress nungi MP, Saugata Roy-i adjournment motion benoka liasü.
Iba sülen NRC onük nung o toktepba mapang Union Minister, Rajnath-i, “Assam nung NRC inyakyim ajungaji Supreme Court ketdangsüba kübok inyak. Iba ya tatembangbuba masü saka draft ka dang lir, anungji ibaji anema mepishitsü atema ajaki maongka angutsü. Iba ya kanga teladak süa tim agi inyakogo. Tamendakdak makai aitsübaji kanga tia maka,” ta ashi.
NRC tatembangbuba draft nung nisung lakh 40 shi tenüng züngdokba onük nung opposition party temi sorkar aitsüdar, talisa TMC tongti aser West Bengal Chief Minister, Mamata Banerjee-ibo, NRC ya ajanga azü tokshitsü aser rara adoktsü, ta jembia liasü.
Tawa Assam nung NRC final draft sangdongba sülen iba tensaji asadangtsü atema TMC nungi teshimtet telok ka Assam-i yok, ajisüaka yashi Assam kübok Silchar airport nung parnok pua ayu.