NRIs tem Assam nung shishilembatsü Sonowal-i ajungshir

Bengaluru, January 09 (Agencies): North East den külemi Assam ainba ajanga Asia ajunga nung terenlok alitsü asoshi India nunger bendang linüktem nung alir (NRIs) nisungtem dang Assam nung arua shishilembatsü asoshi Assam Chief Minister Sarbananda Sonowal-i ajungshia liasü.
“Tarutsü nung India aintsübaji North East ajanga Asia anüdoklen nungi anülulen aser East Asia renlok nung ang akoktsü aser sorkari tekaratiba nung Act East Department ka tenzükba ajanga kiyonger linük den arrtsülen aliba tesemtem nung lenmang balala bushitettsü,” ta Bengaluru nung Pravasi Bharatiya Divas tesem nung Chief Minister Session alidang Sonowal-i shia liasü.
Iba ajanga business, communication, investment aser sobaliba tesentaktep tali tashi taitba akümtsü, ta pai ashi.
Assam nung kiojen temelenshi, land policy, investment, junga yimsü asüba, tesem balala den tesentaktep, nüburtem kümzüka teyari agütsüba nung tesem aika nung temelenshi aruba mapang lir, ta Sonowal-isa shia liasü.
“Assam ya ainer aser asen nüburtem shishilembaba tongtipang tesem ka kümdagi. Assam ya tesem tetemsü, ali rongsen teperi aliba aser mapa inyaker takotet aliba ajanga shishilempatsü tesem tajung lir,” ta Sonowal-i ashi.
Assam ya East-West corridor, anüng nung tayimtsü aser railway ajanga linük nung tongtipang yimti ajak den sendaktepa lir. India nung airport timtiba aliba tesemji Assam ya ka lir aser international airport Guwahati nung lir, ta paisa shisem.
Brahmaputra ayong ajanga Kolkata aser Bangladesh nung aliba sea ports den sentakteper aser Trans Asian Railway aser Trans Asian Highway yanglutsü aliba ajanga BIMSTEC aser ASEAN linüktem den sentakteptsü, ta Assam Chief Minister-isa ashi.
Sonowal-i NRI entrepreneurs aser foreign representatives ajurua Assam nung industry indaktsütsü asoshi yariteptsü ajungshia liasü.
Iba senden nung NRI delegates US, UK, Canada, Oman, Qatar, Saudi Arabia, Philippines, Malaysia, China, Kenya, Mauritius, West Indies aser France nungi company balala arua shilem agia liasü.