NRMSATA-i Education Department (RMSA) nem anogo 7 latettsür

Dimapur, July 3 (TYO) : Nagaland RMSA Teachers Association (NRMSATA) 2015-16-i district conveners den külem executive meeting amendang Education Department (RMSA) dang anogo 7 tsüngda itasen agütsütsü atema mapang latettsütsü telemtetba agi.
“Onoki aiben tezüluba ajanga temepishiba agütsüogo, mission director den executive meeting menogo aser ano tanga mapa aika inyakdangogo, saka department-i onok khuret atema mebilemtsür,” ta NRMSATA president, Renbemo L Patton aser general secretary, Kezhothito Keyho nati sangdong ka nung metetdaktsü.
Küm tesadang ka tashi itasen mongui mapa meranga inyaka aruogo saka joko onoki tepok tazüngbo mapa inyaktsü mekoki kümogo. Nagaland nung Education minister-i school nung bio-metric attendance tenzüktsü, itasen cash nung agütsütsü amala mapatem inyaktsü tebilemba onoki (NRMSATA) pela agizüker, ajisüaka teinyaktsü meinyaki alibatem tamasa inyaktsüla, ta NRMSATA mendenpurtemisa metetdaktsü.
Minister-i tamasa tesayurtem nüngdakba ajiteta mapa inyaktsüla aser itasen mapang shitak nung agütsütsübaji tongtipangtiba lir. Tesayurtem madak ozüng tesashi meyanglu nunga mapang shitak nung itasen agütsüra, tesayurtemi pei teinyaktsü mapa shitak inyaka aotsü, ta NRMSATA-isa metetdaktsü.
Bangdak department-i mapang lateta agütsüba tsüngda mapa shitak meinyakra, RMSA tesayurtemi junger ta bilemba mapa inyaktsü. RMSA tesayurtemi ‘no pay no work’ tangatetba nung noktaktsü akok aser iba ajanga tetsükdaktsü kar ajururu RMSA tesayurtemi iba khuret mabentsü, ta NRMSATA sangdong nungsa metetdaktsüogo.