NSA-level senden nung kiralongraba onük jembitsü: Sorkar

New Delhi, August 20 (Agencies): Brihostibar nü India sorkari, kidanger linük (Pakistan)-i Kashmiri Separatist lenirtem ajuruaka India-Pakistan NSA-level ken o jembitsü aliba methinentsü, ta maneni metetdaktsüba den külemi iba senden nung kiralongraba ken otem aser kiralongraba nokdangtsü onük tongtibangsüa jembitsü, ta shiogo.

Tanü New Delhi nung osangbenertem den jembidang Telecom Minister Ravi Shankar Prasad-i, “Iba senden ya kiralongraba ken o jembitsü aser kiralongraba nokdangtsü atema nüngdaka aliba onük jembitsü asoshi lir,” ta ashi.

Deobar nü New Delhi nung India-Pakistan senden amentsü lia Pakistan high commission-i Separatist lenirtem ajuruba dak sentakba nung osangbenertemi asüngdangba ka langzüdang Prasad-i, “Ni iba ya lepshia ashir, iba senden nung jembitsü onükji Ufa (Russia) nung Ato kilonser Narendra Modi aser Nawaz Sharif na tsüngda lemtetogo,” ta ashi.

Minister-isa, iba senden nung onükji ministry of external affairs-i benoktsü, ta ashi.

Union Cabinet-i Hurriyat lenirtem house arrest atema lemtetba dak sentakba nung tasüngdangba aika langzüdang Prasad-i, Jammu & Kashmir sorkar indang police inyakyim nung pai kecha mashitsü, kechiyong state police dak iba tashiji lir, ta ashi.

Pakistan-i ceasefire temzüng alema inyakba mapang ka nung Congress lenir Rahul Gandhi-i Poonch semdangtsü sentong aliba dak sentakba tasüngdangba ka langzüdang pai, Congress leniri linük tesem ajaklen senzütettsü, ta ashi.

Taruba hopta Congress lenir Rahul Jammu & Kashmir-i oa arrtsülen bomb agi takoksa ajururtem ajurutsü sentong lir.