NSA senden nung kiralongraba onük dang jembitsü: Sushma

New Delhi, August 22 (Agencies): Tanü Honibar nü External Affairs Minister, Sushma Swaraj-i, Pakistan linüki Hurriyat ya tasembuba party ka kümdaktsüra mesüra Kashmir onük benokra parnok den NSA senden mamentsü, ta shiogo.
India aser Pakistan naprongla nungi National Security Adviser (NSA) senden nungji kiralongraba onük dang jembitsü, ta India-i shiogo.
Sushma-i, Simla Agreement nung ajemdaker tasembuba party ka malitsü aser Ufa senden amenba sülen sangdong agütsüba nung ajemdaker NSA-level senden nung kiralongraba onük dang jembitsü, ta metetdaktsü.
“Simla Tezüngzüktep nung ajemdaker, iba ken o jembiba senden nung Hurriyat ya tasembuba party ka mekümdaktsütsüla, aser Ufa sangdong nung ajemdaker, kiralongraba onük dak alia tanga onük mebenoktsüla,” ta Union Minister-i ashi.
“Pakistan-i Kashmir ya tongtibang onük, ta jembir saka parnoki ibaji Ufa (Russia) nung süoka mejembi, Kashmir onükjibo tesülen benoka jembitettsü,” ta India foreign minister Sushma-i ashi.
Pakistan NSA, Sartaj Aziz aser India NSA, Ajit Doval na New Delhi nung August 23-24 nü senden amentsü bangjema lir. Russia, Ufa nung linük anaprong nungi Ato kilonser senden amenba mapang iba senden amentsü asoshi lemteta liasü, iba sülen linük anapronglai iba senden indang külem sangdong ka ajanga metetdakja liasü.
Iba senden nung Kashmir onük jembitsü ta Pakistan-i benokra India-i kechi asütsü (?) ta asüngdangba langzüdang Sushma-i, “Yamaji süra senden mamentsü,” ta ashi.
Laisa, “Arung aser kiralongraba onük jembiang, na pelaa agizüktsü,” ta ashi.
Sushma-i ashiba agi, Ufa nung sangdong agütsüba ajanga Pakistan Ato kilonser Nawaz Sharif par linüki meyipa aruba sülen pa aitsüba jenti liasü aser ibaji ajanga NSA senden mementettsü atema parnoki meranger.
“Ufa sangdong nung onük ajak tejangja liasü aser linük anapronglai melungtepa agizük, ajisüaka kechi asü (?) Nawaz Sharif meyipa marudang yongi iba sangdong atema pa taitsüba liasü. NSA senden mementettsü asoshi parnoki langka inyaktsüla, ta parnoki lemtet,” ta lai ashi.
“August 23 nü New Delhi nung senden amentsü atema onoki parnok dangi July 23 nü shidi ka yok. Iba shidi telangzübaji onoki August 14 nü angu,” ta minister-i ashi.
“Iba telangzüba den külemi parnoki onük kar benok, iba nungji kiralongraba dak alia tanga onük densema lir,” ta lai ashi.