NSBIHRC-i sorkar dang nübortem yaritsü ayongzüker

Dimapur, March 29 (TYO): Nagaland State Board of the International Human Rights Council-i state sorkar dang shidi ka ajanga tebilemba kar lemsatepogo.
“Chief Minister-i anir state lennirtem, Chief Secretary-i anir administration aser Civil society lennirtemi anir yimtsüng tashi nung lennirtemi maparen ajak nung ochishia inyaktsü mepishir. Nenoki mapa inyakba osang aser temetettsütem ajak social media dena media platforms ajak nung sangdongtsüla” ta Nagaland State Board of IHRC-i ashi.
Guwahati mozü ki balala nung cancer agi shiranger aika Chemo courses agir. Dimapur nung mozü mangur aser tang shirangertem kanga timtemer. Ano külen, pacemakers enoka aliba temulungjang timtem lir aika lir. Anungji, state sorkari item shirangertem atema ambulance renema ayutsüla aser parnoki mozü shitak angutsüsa mapa inyaktsüla, ta parnokisa ashi.
Tanga district nungi arua azünger aika Dimapur aser Kohima district nung lir. Parnoki pei alidaki moutettsüsa tensa ajuruba ajanga timtemteper aser parnok aika jangotsü aser aonsotsü alitsü makoker, anungji parnok ket nung BPL card maliyonga sorkari jang aser tanga nüngdakbatem agütsütsüla, ta parnokisa metetdaktsü.
Maneni, Railway Station nung anendaka alirtem nem chiyungtsü aser anenzükdak agütsütsüla. Hotel kar nunga nisungtem taolen makai aliba osangtem lir, anungji sorkari helpline numbers ajanga parnok yaritsüla.
Kibong karbo anogoshi aayangi aoba ajanga dang chiyunga-jema alir aser parnok rongnung Auto Driver meyirjang aika lir. Anungji sorkari parnok yaritsü atema lenmang kar bushitsüla aser iba atema yimtsüng ketdangsertem mesüra police-i PA (Public Announcement) system ajanga osang tongta teyari balala agütsütsüla, ta Nagaland State Board of IHRC-i sorkar dang ashi.
Village guards aser volunteers-ia mapa inyakdang tekümdangtsü aser teinyaktsü ajak shitak inyaktsüla. Colony/village gates mita anükertemi tepila ayutsüla aser sensotem nem timtem magütsütsüla, ta parnokisa ashi.
Medical mapa inyakertem asoshi Personal Protective Equipments (PPEs) peria mali anungji state sorkari District Hospital ajak nung peria agütsütsüla. State sorkarisa tekaratiba nung Nagaland nung COVID19 testing centre ka laoktsüla.
Ano, shishilembadak mask peria mangur anungji sorkari skill development nung tailoring projects kübok training agütsürtem nem allowances aser materials agüja yangludaktsütsü nüngdaker, ta parnokisa ashi.
Talisa, Nagaland sorkar kübok department balala nung inyaker shia itasen nungi anogo ka sen agizükba ya anentsüla. Iba melena traffic, police aser medical personnels nem ang special allowances agütsütsüla, ta Nagaland State Board of IHRC-i metetdaktsü.
Nija mozü ki nung inyaker aika ket nung Covid19 anema raratsü atema osettsüset peria mali, anungji state sorkari iba asoshi mapa kar inyaktsüla, ta parnokisa ashi.
District Administration den Municipal Council temi gari lenmang aser public adenshiba tesemtem mapang shia mozü agi merüktettsüla, ta Nagaland State Board of IHRC-isa metetdaktsü.