NSCN-i CNC Tir, Eustar Chishi Swu nem tenüngsang agutsü

Dimapur, March 23, 2017 (TYO): March 22, 2017 nü Council Headquarters (CHQ), Hebron nung National Socialist Council of Nagalim (NSCN) Council Meeting alidang taoba Yaruiwo, asür Isak Chishi Swu kinüngtsü, Eustar Chishi Swu February 10, 2017 nü Council of Nagalim Churches (CNC) Tir shimba atema tenüngsang agutsüogo, ta MIP/Hebron sangdong ka ajanga ashi.
Taoba lenir, asür Isak Chishi Swu ya CNC mezüngbuba Tir liasü aser pa alima nungi pilaba anogo tashi Tir inyaka liasü.
Wt. Eustar Chishi Swu-i 1971 küm August 25 nü linük tenzükba nung aden aser la kinüngbu den külemi lenla balala aser jenjang balala nung melungtoka tenzüka arudar.
La ya China-i aoba Alee command mezüngbuba group contingent nunga züngsem liasü.
La ya Khrista dak amanger tamangdir ka lir aser lai Myanmar nung eastern Naga nungertem atema ketdangsüa missionary school aika amenoktsüogo, iba den külemi mamangertem Khristan yimsü dangi meyipdaktsütsü atema tenyaba mapa aika inyakogo. La ya atangji Tsüngrem aser linük naprong nendaka tenzüker ka lir, ta sangdong nungsa shia lir.
“Tamang tsütsü onok aser linük lenitsü atema Eustar Chishi Swu ama tindang nisung ka NSCN nung aliba ya kanga tia taka. Tsüngrem sentsüwangshi atema la Council of Nagalim Church (CNC) Tir akumba atema NSCN-i la nem tenüngsang agutsür,” ta kasa sangdong nungsa shia lir.