NSCN (I-M) den ken o takok ngua jembi tenzükogo: PM Modi

New Delhi, August 24 (Agencies): New Delhi nung tanü India nüjiso atema rarar aser Manipur nung asoba Naga lenir, Rani Gaidinliu sor küm noklang ka ajungba sentong nung jembidang Ato kilonser Narendra Modi-i, lai Naga nunger asoshi British anema rarabaji, India asoshi-a raraba liasü, ta ashi.

Rani sor küm noklang ka nüngtem nung commemorative coin sayatsüba sülen Modi-i, Rani ama lenir ka tim bilemtettsü mebilemtetbaji mesüra amadoker ama asübaji tesasatsüka, ta ashi.

Modi-isa, NSCN (I-M) den ken o takok ngua jembiba ajanga külemi jajatsü tenzükogo, aser ibaji ajanga Nagaland dang masü saka northeast (NE) tesem ajak terenlok lenmangi anitsü, ta ashi.

Modi-i, taoba mapang takok aser tamakok aika liaka sorkar balalai iba tesem nung yimjung asoshi inyakogo, ta ashi.

“Iba tenüng ya sorkar shingaia magir aser shingai-a magitsüla. Tensa ajungtsü asoshi ajaki shilem agiogo. Iba (sorkar balalai meranga inyaka) ya ajanga tanü Nagaland nung NSCN(I-M) lenirtem den ken o takok ngua jembiteter,” ta Modi-i ashi.

Modi-i, “ajaki terenlok indang mangdang nguogo aser India nung adenbaji Nagaland dang masü saka northeast ajak aser linük ajak lir. Ni amanger, külemi longjemer jaja tenzükba ajanga süngjang tajung tangtsütsü aser linüki jenjang temaba ajangzüktsü,” ta ashi.

Paisa, par sorkari northeast tesem nung infrastructure nung terenlok asoshi temelung agüja inyaker, ta ashi.

Ato kilonserisa, connectivity takok ngua inyakra terenlok asoshi tetsükdaktsü kecha mali, ta ashiba den külemi NE tesem nung aliba state tem yimtiba ajak nung railway connectivity asoshi merangdagi, ta metetdaktsü.

Tesem nung jiru atangba aser Nagaland nung mersü atangba dak sentakba nung Modi-i, northeast ya linük nung “organic yimtiba” akümtsü takoktsü lir, ta ashi.

Linük aintsü asoshi NE tesem nung terenlokji kanga tongtibang, ta paisa ashi.

Tanü iba sentong nung Home Minister Rajnath Singh, Finance Minister Arun Jaitley, Nagaland Angh, P B Acharya, Nagaland Chief Minister TR Zeliang aser Manipur Chief minister O Ibobi Singh nunger-a denogo.