NSCN (I-M) züngsemtem aputsü: Manipur CM

Imphal, Rongjui/September 6 (Agencies): All Manipur Students’ Union (AMSU) züngsem aser kentenertem dak Nationalist Socialist Council of Nagaland (Isak-Muivah) NSCN(IM) puri azükba dak sendakba nung item telungpurtem aputsü atema police commandos aser trooper tem Tamenglong district-i yokogo, ta Manipur Chief Minister N Biren Singh Rasemnü metetdaktsü.
Osang ka ajanga ashiba agi, Manipur CM Biren-i, “NSCN (IM) züngsemtemi lokti tsüngda mangatetep adokdaktsütsüsa o jembiogo. Onoki police commandos aser 57 Mountain Brigade nungi sepaitem aija alirtem aputsü asoshi yokogo. Iba amala lokti anem inyakba maparen kodanga magizüktsü,” ta ashi.
Iba tatalokba ya Tamenglong district kübok Nungba tesem nung students’ union züngsem aser kentenertem Assam nung Tentonü aonung sentong ka nung dener aruba mapang National Highway (NH-37) nung atalok.
“Iba ken o nung aija aliba NSCN-IM züngsem parnok pezü yagi kaketshirtem aser kentenertem mena aliba bus sot aser parnok ajak dang nungi sen 500 meshi. Parnokisa general secretary S Anil aser tetsür kar dak teka sangshi,” ta AMSU tir Manjit Sarangthem-i ashi.
“Telungpurtemi kaketshirtem dang Naga nunger aliba tesem nung Manipur wako ayipshia mesüitettsü ta ashi. Iba janga telok ana tsüngda mangatettep adok. Iba sülen kaketshirtem aser kentenertem dak parnoki azük,” ta pisa ashi.