NSCN-i pei sasa yimsüsüba takhangba magien: Muivah

New Delhi, July 8 (Agencies): Centre sorkar den yaküm framework agreement agiba National Socialist Council of Nagalim (Isak-Muivah) general secretary, Thuingaleng Muivah-i osangbener den jembidang parnoki pei sasa yimten yimsüsütsü takhangba metoktsü, ta metetdaktsü.
Muivah-isa ashiba agi, “Naga nunger atema nisan balaka aser passport ji takhangba ka masü saka ibaji onok indang temeten lir, kechiyong Naga nunger kodanga India nunger kübok maliasü.”
“Naga nunger putiotsü khenyongi balaka ta angatetba ajanga ‘shared sovereignty’ indang onük mulunga agizük. Onoki yimten yimsüsütsü takhangba metoktsü” ta paisa ashi.
NSCN (I-M) chairman, Isak Chishi Swu asüba sülen mezüngbuba osangbener den sensaksemba mapang Muivah-i iba osang metetdaktsü.
NSCN (I-M)-i pei sasa yimten yimsüsütsü takhangba toktsüogo aser India Linük Temzüng kübok telatetba ka aginür ta yaküm Minister of State for Home, Kiren Rijiju-i metetdakja liasü.
Muivah-isa ashiba agi, Centre den olemtep takok ngua tembangtettsü ta ashi.
“India sorkari tang ya tajunglen bilema mapa inyaker anungji iba olemtep takok angutsü ta onoki temulung alemer” ta pai ashi.
Muivah ya Manipur nungi Naga nunger ka lir aser pai Isak Swu den tesüiba küm 52 tashi külemi inyakyonga aru aser pai ashiba agi, Isak Swu asüba ajanga olemtep nung tetsükdaktsü kecha malitsü.
“Olemtep matsülangtsü. Naga nungeri masü saka bendanger tashitem ajanga Naga nunger tsüngda telemsa adokdakja liasü, saka tangbo ibaji angatetogo aser India-ia Naga nungertem takhangba agizüktsüsa akümtsü” ta paisa metetdaktsü.
Muivah-isa ashiba agi, olemtep timi agia aotsü atema framework agreement ji miimbanga ayutsüsa akümer.
“Public dang yimjak nung metetdaktsütsü atema mapang ka arutsü. Telemtetba ka magi tashi framework agreement ji miimbanga ayutsüa akümer” ta paisa shisem.