NSCN-IM denang-deden sign asütsüla: NNPGs

Kohima, March 10 (Agencies): National Socialist Council of Nagalim (NSCN-IM) aden yonga mesüra maden yonga Naga yimten latetang ta Naga National Political Groups (NNPGs)-i interlocutor R N Ravi dang shiogo.
NNPG-i RN Ravi den anogo asemnü olemtepba sülen NSCN-IM den mangatettep liaka tatembang peace accord nung sign süang ta ashi.
Osang ajanga ashiba agi, R N Ravi-i peace accord atema Delhi nung Naga teloktem den sendentem amen.
“Working Committee, NNPGs aser India sorkari mashii mapang ka nung tenangzüktep nung sign sütettsü kechiyong ibaji Naga nunger taginüba lir. Onoki ozü nübortem dang status paper lema agütsüogo aser ibaji parnoki agizüker” ta NNPG lennir kati ashi.
Yaküm October ita Naga yimten tebilemtsü atema olemtepa aruba tembang.
Centre sorkar aser NSCN-IM tsüngda obang meputepa agi Naga yimten tebilemtsü atema tatembang telemtetba ka magiteter.
Tawa tu, NSCN-IM-i Naga nunger indang wako aser constitution balaka meshiba nungi masetshii noktakba metetdaktsüogo.
February 27 nü NSCN-IM sangdong ka nung “Naga National flag aser Constitution ya ozü linük maitsü lir aser Naga yimten latetba nung tongtipang lir” ta shia liasü.
NSCN-IM-isa ashiba agi, Centre-i Naga yimten latettsübaji Naga nunger ajak atema asütsüla ta ashir.
NSCN-IM-i accord sign asütsü atema mapang atsülanger ta taoba mapang R N Ravi-ia shia liasü.
NSCN-IM-i ‘Greater Nagalim’ takhangba agütsür aser iba nung Assam, Manipur aser Arunachal Pradesh state tem nung Naga nunger aliba tesemtem dena lir.
Ajisüaka, Centre-i state asem nung Naga nunger aliba tesemtem Nagaland state nung lokteptsübaji memulunger.