NSCN-IM-i Manipur nung battalion tasen amenok

Imphal, February 13 (Agencies): NSCN-IM aser India sorkar na tsüngda ceasefire liaka ibaji officially Manipur state tashi yanglua mali, aser tanü parnoki Kasom Khulen Sub-Division kübok Kangkum yim nung battalion tasen ka amenokogo.
Osang ka ajanga ashiba agi, NSCN-IM indang tang tasen amenokba battalion nüngjaji Phungtha Battalion lir aser ibaji tanep 10:00 ako meta Kangkum yim anasa amenok.
Iba yim ya tang tasen tentetba district, Phungyar kübok lir.
Kasa osang ajangasa, iba battalion nung Commanding Officer ji nisung ka tenüng agi Joyful lir aser tashiji züngsem 45 liasü.
Maneni kasa osang ajangasa, NSCN-IM-i battalion ji Tasom yim nung tentettsü sentong liasü, saka administrative tsütsü lenla mesütepba ajanga iba battalion ji Kasom Khullen nung amenoker.
Tang tashi nungbo Manipur litsü telung nung NSCN-IM indang battalion amenokba official osang mali.
India sorkar aser NSCN-IM tsüngda ceasefire Manipur tashi atsülangba ajanga 2001 küm June ita nung ibaji anema Manipur nung longkak sashia aita liasü. Iba mapang nung nisung 20 asü aser India sorkari Manipur tashi ceasefire atsülangba telemtetba meyipa agi.
Tawa Minister of state for Home Affairs, Kiren Rijiju-i, NSCN-IM-i ozüng alema inyakba osang state sorkar nungibo mali ta jembiba den külemi ozüng alema inyakbatem lira ibaji state sorkar ketdangsertemi reprangtsüla, ta jembia liasü.