NSCN-IM ket nungi nisung ka kümzük

Dimapur, September 30, 2023 (TYO): September 29, 2023 nü Singrijan/Selouphe lenjem nung telungpurtemi nisung kar pur oya lia police-i kümzükogo.

Hokolbar aonung 9:50 ako meta Sovima Police Station duty party ka ajanga MVCP inyakdang registration number plate maliba Maruti Alto car (silver colour) ka sot ta Dy. Commissioner of Police (Crime)/PRO, Dimapur-i sangdong ka nung metetdaktsü.

Police-i gari mita reprangdang nisung pezü mena liasü aser par asemi parnok NSCN-IM züngsemtem ta ashi aser tanüngba nisung jagi pa GB New Market area, Dimapur Abdul Kayum Talukdar ta langzü.

Police-i gariji maneni mita aodang tammang nung nisung ka jena ao aser ibaji Captain Ahor Tangkhul ta par külem züngsemtemi ashi.

Abdul Kayum Talukdar dang asüngdangya asüdang pa Hotel Theja Fort, Burma Camp anasa nungi par asem jagi tashiyim agi apu aser iba gari nung mener anir ao ta ashi.

Talukdar-i ashiba nungji ajemdaker New Market Business Owners Association züngsemtem lia police-i par kinunger ket nung pa agütsü, ta Dimapur Police PRO-isa sangdong nung ashi.

Iba tatalokba dak sendakba nung nisung ana puogo aser East Police Station, Dimapur nung FIR ka benokogo.

Police-i apurtemji Captain Masalepzuk (S/o Talinungkum, V/o Kantsung, PS – Tuli, District – Mokokchung, P Add – Burma Camp, Rongmai Colony) aser Lieut. Isacar Swu, 39 yrs (S/o Yetozhe, V/o Khughuto, PS – Pukhuboto, District – Zunheboto, P Add – 4th Mile near Agri Expo) ta jangjaogo.