NSCN-IM o India sorkar na tsüngda renemba ken o sayutsüla : ACAUT

Honibar nü ACAUT teloki ayongzükba lokti senden nung yimjung yanglur Niketu Iralui jembiba noksa nung angur. Dimapur, Sept. 12, 2015.

Dimapur, September 12 (TYO) : Telok kari madentsü aser kari thitemtsü shiaka, tanü Honibar nü Dimapur nung ACAUT teloki Naga yimten tebilemtsü latettsüba maparen nung shisalemsateptsü asoshi ayongzükba senden takok ngua agiogo. Iba senden nung o jembir ajungai NSCN-IM o India sorkar na tsüngda renemba ken oji sayutsüla ta metetdaktsü.
Iba senden nung jembidang, Naga yimten aser loktiliba onük nung kanga tasü itta jembir, Wb. Khekiye K Sema, IAS (Retd)-i NSCN-IM o India sorkar na tsüngda Naga yimten latettsüba dak aketba ken o renema alibaji nübortemi metettsü nüngdaker ta metetdaktsü.
NSCN-IM telok o India sorkar na tsüngda Naga yimten latettsü asoshi jembia aotsü atema tamendakdak ken o renembaji osang tajung lir, ibaji ajaki pelaa agizüktsüla saka iba tangatettep ken o renemba onüktemji yimjak nung metetdaktsü nung dang nübortema shisalemsateptsü akoktsü ta paisa ashi.
” Kechia komaka renema lirar memeteti NSCN-IM teloki ayongzüka lokti tentet aser Hoho tapu balala den shisalemsatepba sentong agibaji NSCN-IM leniri Naga nunger nübortem ajaki mulunga agizüker amato magitsüla,” ta Khekiyeisa metetdaktsü.
Kasa senden nung Niketu Iralu-i jembidang, Naga nunger linük tenzüker telok ajak külem mener India sorkar den jembitsüba onüktem benoka shisalemsateptsüla aser ibaji atema NSCN-IM teloki tanga Naga yimten teloktem jaoktsüla ta metetdaktsü.
Ano, kasa sentong nung Overseas Nagas Association nung tir Dr.Visier Sanyu-ia jembidang, Naga yimten tebilemtsü ya tatem küma latettsü asoshi Naga nunger linük tenzükertem telok ajak jaoka jembitsüla aser NSCN-IM telok dak ochi aser tangar dena külemi otettsüsa shisa tajung alitsüla ta metetdaktsü.
Iba kasa senden nung Emeritus, Principal, Patkai Christian College, Dr Tuisem Shishak-ia jembidang, Naga nungeri sovereignty aser Naga nunger lushi ajak yimten ka kübok alitsü asoshi taküm tenla dena agüja jembiba mapang ka, Naga nunger telong nungbo meputep agi sünger telok aika kümsa lemsatetogo, iba jagi Naga nunger asoshi inyaktsü melen pei pei kibong aser pei telok asoshi nübo, mapang aser rongsen ajak tenla endoker ta Shishakisa metetdaktsü. Paisa NSCN-IM lenirtem dang tangar teloka dena Naga yimten nüjiso latettsüsa tonga oagi parnok dena shisalemsateptsü nüngdaker ta metetdaktsü.
Iba senden nungsa Dr. VK Nuh, general secretary Fellowship of Naga Baptist Associations & founder member of FNR-i jemjidang, Naga nunger ajak longjemer inyaktsü asoshi tayongzükba agüja liasü
Kasa senden nungsa Dr. Mazie Nakhro, Director,Mission Facilitator, USA-ia tenüngsang aser tajungshi o jembia liasü.