NSCN-IM sorkari apuani khasetertem bushir

Dimapur, Feb.11 (TYO): Tan February 06 nü Kiphire o Shamator na tsüngda apuani khasetba mapaji kanga sashia aitsür ta NSCN-IM sorkar Government of Peoples’ Republic of Nagalim (GPRN)-i metetdaktsüogo.
Nisung khasetba lendong sülen ano telok telok kümer tesem tesem nung kiojen rongdoktsüba aser raksatsübajia aitsür ta GPRN-isa metetdaktsü. Parnokisa asür kinunger aser tsüraburi toktsür aoba tanurtem den külemi mangyim jashi lemsateper ta metetdaktsü.
Iba ama lendong tuluba mekümdaktsüi yimjung agi akoktsü merangtsüla. Iba lendong yagi kaketshir aika tatidang junga magütsütet akoksadagi aser nübortem aika pei mapa meinyakteti timtemdagi, ibaji loktiliba nung kenyongi tim masü ta parnokisa metetdaktsü.
Iba lendong atalokba maparen ya bushisüngdang tenzükogo aser kiralongraba mapa inyakertem nem tim obendang agütsütsü merangtsü, anungji ajaki yaritepdaktsüner ta GPRN sangdong ka ajanga metetdaktsüogo.

You must be logged in to post a comment Login