NSCN Joint Council-i ‘Framework Agreement’ pela agizüker

Dimapur, August 29 (TYO) : August 11, 2015 nü National Sociatist Council of Nagalim Joint Council senden nung August 3, 2015 nü Government of India (GoI) aser NSCN tsüngda ‘Framework Agreement’ agiba pelashishia agizükogo aser iba dak sendakba nung telemtetba kar agiogo, ta tanü sangdong ka nung metetdaktsü.
Iba senden nung Collective Leadership züngsemtem, Steering Committee züngsemtem, Council of Kilonsers, Tatar, Head of the Department ajak, Central Administrative Officers aser Naga Army commanders ajak aden, ta Qhevihe Chishi Swu, Convenor Steering Committee aser Rh. Raising, Kilo Kilonser, GPRN nati sangdong ka nung metetdaktsü.
Iba senden nung adenertemi August 3, 2015 nü GoI aser NSCN tsüngda ‘Framework Agreement’ pela agizük aser pusema nungtittsü bangjemtep.
Senden nung adenertemisa, India Prime Minister, Narendra Modi, GoI Interlocutor R N. Ravi, tanga India lennirtem aser NSCN Collective leadership, Isak C W Swu, Chairman, Th. Muivah, General Secretary aser Indo-Naga Political Talks nung Chief Negotiator nungertemi iba otsüsütsü tenangzüktep agitettsüsa nendaka inyakba atema tenüngsang agütsü.
Joint Council senden nungsa telok anapronglai agizüktetba aser teti atema telemtetba ka agitsü atema inyakba mapa nung pusema yariteptsü telemtetba agi, ta Qhevihe Chishi Swu aser Rh. Raising nati sangdong nungsa shia lir.