NSCN-K den ceasefire metenzükshitsü

Shillong, May 02 (IANS): NSCN-K telungpurtem den  ‘ceasefire’ tenzükshitsü atema India sorkar kecha sentong mali, ta home ministry ketdangser kati Hombarnü ashi.
“NSCN-K den ceasefire tenzükshitsü atema India sorkar tsütsülen nungi tongtepratepa inyakba mesüra mera agiba tangbo onok nungi kecha mali,” ta home ministry joint secretary in-charge of northeast affairs Satyendra Garg-i osangzülurtem den jembidang ashi.
Garg, shibai state Home Minister Roshan Warjri den külemi Meghalaya nung tzüzüng ozüng azüoka tensa asadanga liasü, pai National Socialist Council of Nagaland-Khaplang telok anema tongpang maneni alitsü ta ashi. “NSCN-K anema onoki maneni ‘operation’ alitsü. Iba dak alaka Nagaland nung tanga tensa yabo junga lir,” ta pai ashi.
State nung yimjung maparen takok ngua tejakleni anitsü atema NSCN-K telok den ceasefire tezüngzüktepba tenzükshitsü atema tamalen Nagaland Chief Minister T.R. Zeliang-i India sorkar dang mepishia lir.
Ceasefire tezüngzüktepba asüngsashitsü ita ka dang lia, March 27, 2015 anogo NSCN-K tekolak S.S. Khaplang-i India sorkar den yimjung tezüngzüktepba raksa.  Telok ana tsüngda yimjung tezüngzüktepba meyongnem ya 2001 küm agitepa liasü.