NSCN-K-i ceasefire agienba atema tebilemtsü akar: Rajnath

New Delhi, July 17 (Agencies): Naga telungpur telok, NSCN-K-i ceasefire tezüngzüktep agienba ajanga Nagaland nüburtem, state aser Centre sorkartem nem tejashi aser tebilemtsü bener arutsüogo, ta Hokolbar nü Union home minister Rajnath Singh-i ashi.
Rajnath-i iba o ya Nagaland nungi Speaker Chotisuh Sazo aser chief minister T R Zeliang lenisüba nung minister aser MLA teshimtet telok ka pa ajuruba mapang parnok dang shia liasü.
State sorkari mera agia alibatem asoshi home minister-i pelaba lemsatepba den külemi nübürtem mulungjang nung tetsübu malitsüla, ta ashi.
Taoba ita Mapinur nung Indian army 18 tepsetba densema tawa rara aika adokba nung NSCN-K densema lir. Iba tatalokba sülen Indian Army commando temi Myammar nung telungpur teseptem maka liasü.
Nagaland nungi aoba teshimtet yimtenren lenirtem jagi Naga yimtenren onüktem balala benoka o lemtepba den külemi parnoki Naga yimjung asoshi nendaka inyakba metetdakja liasü.
Tekaraba nung iba onük telatetba tajung ka dangi arutsü imlar, kechiyong lokti tentettem aser Naga nungeri yimjung aginer, ta parnokisa metetdaktsüogo.
Iba telok nungi züngsemtemi benokba ken o ajunga angadangba sülen Singh-i, state aser northeast tesem nung yimjung asoshi India sorkari inyaker aser iba dak sentakba nung nüngdakba teyari agütsütsü ta shiogo, ta sorkar ketdangser sangdong ka ajanga metetdaktsü.
Iba jakdang kasa telokisa minister of state for home Kiren Rijiju-a ajurua pa den onük balala lemtepa liasü.