NSCN-K-i Myanmar sorkar dang mepir

Mongwa, April 15 (Agencies): Yimjung olemtep alitsü atema lennirtem chiokang ta National Socialist Council of Nagaland’s Khaplang (NSCN-K)-i Myanmar sorkar nem takhangba agütsü.
“Myanmar sepaitemi ozü lennirtemi mechiokra, yimjung olemtep nung timtem ajurutsü” ta NSCN-K liasion officer Juvlengthong-i ashi.
Taküm February ita Sagaing province kübok Taga nung Myanmar sepaitemi NSCN-K indang headquarters atsünga agidang lennir 10 aser sepai 6 apu, ta pai ashi.
Lennir pungubo chiokogo saka tanüngba 5 ano mechiok lir. Chiokertem rongnung health kilonser (minister) Eno Ngaitum, education kilonser Eno Manglwan, legal affairs kilonser Eno Athrom, agriculture kilonser Eno Longsa aser central committee member Eno Tomthong nungertem lir, ta Juvlengthong-isa metetdaktsü.
NSCN-K peace team chairman U An Kam aser vice chairman U Kyaw Wan Sein naprongla tepuokdak yua lir. Tena ya Unlawful Association’s Act kübok tai tonglokja apu. April 19, 2019 nü parnok okadaki anir oa ken o angadangtsü lir, ta paisa ashi.
State counsellor Aung San Suu Kyi-i aniba National Peace and Reconciliation Centre aser Burmese army chief Senior General Min Aung Hlaing dangi shidi züluogo saka tang tashi telangzüba kecha mali, ta Juvlengthong-isa shisem.
President atema otongdar U Zaw Htay-i ashiba agi NSCN-K lennirtem dak tai tonglokja apuba onüktem meyipa reprangshidar.
Northeast India nung telungpur telok kari India nung ozüng alema mapa inyaker aser NSCN-K-i item telok jenokdaktsü, ta Myanmar Army-i tai tongloktsür.
Sepaitemi nisung 36 tashi apu aser parnok teimba ka local Naga nungertem lir. Naga self administered area Sagaing nunga sepaitemi tenokdangbatem agüja lir.
Myanmar sepaitemi ULFA tesep ka amak aser idangji ‘Major’ Jyotirmoy Asom den züngsem asem tepset. Iba sülen nungi ULFA züngsem aika temai adoker.