NSCN (K)-i yimdaklirtem tenokdangtsü ama amshia khatep : AR

Phek, July 16 (TYO) : Indo-Myanmar arrtsü anasa Avangkhu o Pokhungri yimtsüngtem nung NSCN (K) telungpurtemi tanurtem tashiyim agi pur aoer aser parnok züngsem kümdaktsür ta osang angazükba sülen July 15, 2015 nü Meluri Sub Division kübok Avangkhu-i sepaitem iba osangji metetpelatsü atema yok, ta tanü Assam Rifles PRO-i sangdong ka ajanga metetdaktsü.
Iba mapang NSCN (K) züngsemtemi sepaitem dak injang khaloktsüba agi meyiper khatepdang telungpur ana khaset. Tenaji ka Phor yim anasa aliba Wuzu yimer Puhachu aser ka Eastern Naga (Myanmar nungi Naga nunger) ta jangjaogo, ta sangdong nung shia lir.
Itdangiter osang ajanga ashiba agi, Phor yimtsüngi NSCN (K) züngsemtem pusema yarir. Taküm April 15 nü Phor yim anasa NSCN (K) indang training camp tongti ka den firing range o training area nunger sepaitem makdokogo, ta AR sangdong ajanga ashi.
Mapa takok ngua inyakba sülen sepaitemi NSCN (K) telungpur mang ana den tena ket nung anguba prangpongtem Akhegwo Police Station ket nung agütsütsü atema bener ao. Idangji Phor yimertemi Assam Rifles indang gari pezü anendaktsür, Company Commander dang Puhachu mangji parnok nem agüjang ta ashi. Ajisüaka, Company Commander-i mangji mezüng police ket nung agütsütsü aser idakji teinyaktsütem tama inyaktsü ta langzü.
Iba ya aonung 6:45 ako meta liasü aser sepaitem o yimdaklirtem tsüngda o atsütepba jembiya lia, Assam Rifles indang gari mezüngbuba dak tesem balala nungi injang khaloktsü. Injang timbaka yim tipkülen nungi liasü aser iba tesem nung jagi tesangwa adokba angu, ta AR PRO-isa sangdong nung shia lir.
Injang khaloktsüdangji yimdaklirtem taoksa nung jenshi aser Assam Rifles sepaitemi meyiper NSCN (K) telungpur dak injang khaloktsü, saka sepaitemi yimlenbo injang mekhaloktsü. Iba mapang AR sepai ana injang agi yiru aser tena Akhegwo-i anir ao.
Mapang tatsüka lir külen, Phor yimtsüng nung tanur ana den tantsür ka injang agi khashi aser tanur anaji asü ta osang angazük. Iba ya NSCN (K)-i tenemlen nungi injang khaloktsüdang yiruba asütsü, ta AR PRO-isa ashi.
NSCN (K) züngsemtemi sepaitem amaktsü atema yimdaklirtem mesüzük aser Assam Rifles gari sottsü atema tetuyuba agütsü. Yimlen nungi injang khaloktsüba ajanga NSCN (K)-i yimdaklirtem parnok tenokdangtsü ama amshiba sayur. Iba ya ajanga tanur ana khaset aser tantsür ka yiru, ta AR sangdong ajanga metetdaktsü.