NSCN-K (Khango) ajanga amokmerenba aitsür: RSZ

Dimapur, Chiteni/July 29 (TYO): NSCN-K (Khango) teloki angami kin nungi senso tejangja ka nem tasüba temerenshi agütsütsü amokmerenba atema shisabolur aser aitsür, ta Rengma Selo Zi (RSZ) sangdong ka ajanga ashi.

Iba ama amokmerenba mapa asen lima nung matalokdaktsütsüla aser iba yagi Naga nungeri mapang talangka nungi takok angutsü yongyaba telungjem aser tesunep inyakyim nung tetsükdaktsü agütsür, ta ashi.

Iba ama tensa nung Angami Youth Organization-i tasü ita nokdakba atema akhum agütsür. AYO-i iba ama amokmeren anema nokdaktsü mulungtetba ya parnoki nüburtem asoshi mapa tajung inyakba kuli dang masü saka nüchi mulungsentsü alirtem ajunga ajungmesoba maparen ka lir.

Naga nunger rongnung telungjem aser teti asoshi yimjung alitsü atema One Government – One Taxation ya tongtipang mera ka lir ta angateta yangji onok nokdaka lir ta nenshia sangdonger.

Kati ka dang temeim sayua yariteptsü ya kanga tongtipang ta nüburtemi angateta alidang asen kin tesendaktep amokmerentsüsa iba ama inyakyim ya khenyongi malitsüla, ta ashi.

Factions aser telok ajunga dang tajunglen nungi jembishinüa aser amalitepa, angatettepba aser akumtsübotepba yimya amshitsü ajungshir. Asenok ajak külemi inyakba ajanga dang aser Naga nunger nokdangba tayongzükba tem koktettsü aser yimjung, telungjem aser terenlok nung asenok alitsü, ta RSZ sangdong ajangasa ashi.