NSCN-K tanishisang SS Khaplang süogo

Dimapur, June 9 (TYO): Nationalist Socialist Council of Nagaland (Khaplang) tanishisang SS Khaplang Hokolbarnü alima nungi pilaogo.
Pa arishi küm 77 nung lia Taka, Council Headquarters (CHQ), Myanmar nung asü. Mapang talangka pa temang manemi dang lia aru aser iba jagi pai telok asoshi mapa balala meinyakteti liasü.
SS Khaplang ya Myanmar kübok Waktham yimtsüng nung 1940 küm aso. 1964 küm pai Naga Defence Force tentet aser iba sülen Eastern Naga Revolutionary Council nung chairman aküm. Pa ya Myanmar nung Hemi Naga kin nungi liasü.
1980 küm pa den külemi Thuingaleng Muivah nati Naga National Council (NNC) toktsü aser National Socialist Council of Nagaland (NSCN) tentet. Ajisüaka, mangatettep kar ajanga 1988 nung NSCN telok ana küma lemsa aser ka SS Khaplang lenisüba kübok NSCN-K aser ka asür Isak Chishi Swu (chairman) aser Thuingaleng Muivah (general secretary) na lenisüba kübok NSCN-IM ta tentet.
2000 küm NSCN-K-i India sorkar den Naga yimten tebilemtsü angatetteptsü teimla nung ceasefire alitsü tenangzükba agitep saka April 2015 nung parnoki ceasefire agien.
Iba sülen NSCN-K aser Indian army tsüngda pezüben tashi rara tesashi raraogo. Manipur kübok Chandel district nung 6 Dogra Regiment Convoy ka amakdang sepai 20 tashi khaset aser iba tatalokba sülen India sorkari NSCN-K telok nokdang.
Osang angazükba sülen SS Khaplang asüba sülen Khango Konyak-i NSCN-K Chairman inyaktsü mapa melenzük.