NSCN-K tenüng menüktsürtem merenshitsü

Dimapur, November 7 (TYO): Khehoi camp nung Kilonser, Hokato Vusshe kübok Phulesheto yimer Kughato Chishi aser Xuivi yimer Vikuto Zhimo nati linük anema mapa inyaker, ta MIP, NSCN/GPRN sangdong ka nung metetdaktsü.
Linük tenzükba wadang toktsür aoba züngsemtem aser Indian Security Agencies tsüngda tenati tiyongtsü nung mapa inyaker. Ita ishika tejaklen tena Indian Army nem taila pudaktsüba/temai adoktsü jembitepa yur adokba sülen NSCN (K) züngsem aika puogo, reshikangshiogo aser tepuokdak yua lir, ta sangdong nung shia lir.
Par asemi NSCN/GPRN tenüng amshia tashiyim agi sen saruba inyakyim tenzüka lir aser iba nung Kilonser, Hokato Vusshe-i NSCN/GPRN tenüng amer sen meshiba shiditem agütsür.
Hokato Vusshe-i sen crore aika ochimeshii amshiba aser Naga Army ketdangser tejen ka tepsettsü tasa atongba atema Kilonser menden nungi anentsü aser Chaplee Ministry nungi agien.
Iba sülen 2013 küm pai Kughato aser Vikuto na den sen crore aika alangba NSCN/GPRN indang osettem bener Khehoi Camp nung jenok. Ajisüaka, Kughato aser Vikuto na tanaben NSCN/GPRN-i meyipa aru, saka tenati Hokato Vusshe den miim tasa atonger aruba liasü, ta MIP sangdong nungsa shia lir.
NSCN/GPRN-i India den ceasefire agienba sülen, Hokato Vusshe Zunheboto-i ao aser idakji taoba Chairman, Sumi Region, Hokishe Zhimomi’er kidang Assam Rifles Commanding Officer den ajurutep. Iba mapang pa nem sen aika agütsü aser pai Indian Security Forces den yaritepa NSCN züngsemtem sen agi alizüktsü merangba mapa tenzük. Iba jagi züngsem aika sen agi alizükdakja Khehoi Camp nung aden aser parnok rongnung Town Commander, Zunheboto Maj. Akito, Chairman, Sumi Region aser tangartem dena lir, ta MIP sangdong nung shia lir.
Hokato Vusshe-i prangpong-injang 30 den tema aser sorkar sen aika bener aoba NSCN/GPRN-i meyipa mangu lir. Pai NSCN/GPRN anema mapa inyaker. Küm aika pai RAW aser IB nung züngsemtsü meranga mapa inyaka arur aser iba jagi pa NSCN/GPRN nung alidangyongi maaksü angu.
NSCN/GPRN-i ola madoki malitsü aser Naga nunger anema inyakertem ‘capital punishment’ asütsü, ta MIP-isa ashi.
Ano külen, Viyixe yimer taoba Naga Army züngsem Lt. Akahoto (Hekato) tawa tu Central Jail, Dimapur nungi chiok, saka pai Naga Army Officer ka ama jilu benshia mapa inyaker. Pai Dimapur aser Kohima nung Col. Isak Sumi tenüng amshia Office, Contractor aser Supplier tem dang nungi senotsü meshir saka pa nem iba temelabaji kodanga agüja mali. Anungji, pa dang iba mapa meinyaktsü metetdaktsür aser iba sangdong agütsüba anogo nungi Kohima o Dimapur District tem toktsür aotsü tetuyuba agütsür, ta MIP, NSCN/GPRN-isa metetdaktsü.