NSCN-K tongti lenir ana sayur nem NIA-i sen lakh 17 agütsütsü

New Delhi, Sept. 10 : Manipur len NSCN-K teloki India sepai 18 kasetba lendong ataloker külen tang ita asem sülen NIA teloki NSCN-K telok nung tongti lenir ana indang osang tejangja agütsür nem senpet sen lakh 17 agütsütsü ta tanü Brehostibar nü metetdaktsüogo.
Iba senpet agütsütsü sangdongba osang nung, National Investigation Agency(NIA) teloki NSCN-K nung mendenbuba S.S.Khaplang asoshi jenjang sen lakh 7 aser NSCN-K nung arkotong Niki Sumi asoshi jenjang lakh 10 latettsüogo. Manipur nung Chandel district kübok June 4 nü India sepai 18 tashi taküm samatsütsüsa amakba mapa ya Niki Sumi-i anir inyak ta India sepaitemi puteta lir.
“S S Khaplang ya NSCN (K) telok nung tekolakba lir aser Niki Sumi ya sepaitem rongnung tanishiba arkotong lir. Parnoki March 26 nü Indira Gandhi Stadium, Kohima anasa Assam Rifles amakba aser iba sülen Manipur len Chandel district nung 6 Dogra Regiment purtem ooya aliba Convoy amakba lendong nung sepai 18 khasetba sentongtem ajakji yanglua inyak,” ta NIA sangdong ajanga metetdaktsü.
Nisung shibai item kiralongrartemji aputsüsa osang shitak agütsüdir, parnok nemji iba senpet agütsütsü ta NIA sangdong ajangasa metetdaktsü.
Khaplang yabo Myanmar nung alir saka Niki Sumi yabo Nagaland nungi lir. Osang ajanga angazükba agi, arishi küm 75 tain Khaplang ya tawa mozü kidang shiranga monga liasü aser tesülen China artsülen tesem ka tenüng agi Taga-i belena bener ao.
June 4, 2015 nü Chandel district nung India sepai amaker NSCN-K purtemji ajak agi parnok 23 liasü aser parnok rongnung jagi army-temi nisung ana khaset ta army osang ajanga metetdaktsüogo.
Manipur nung NSCN-K purtemi army amakba mapangji ‘Lathod’ prangpong amshia amak aser iba jagi sepai 18 khaset aser 15 yirutsü. Iba lendong agütsüba sentong nung NSCN-K purtemji telok asem küma lemsa aser lenmang nung dena tinpong nung tapoktsüla bomb enoker yuja liasü.
Iba lendong atalokba sülen, NIA purtemi bushisüngdang mapa inyakdang, akhidang NSCN-K nung inyakertem teyari agia sepaitem amaker telongpurtemji jangjaa liasü.
Iba lendong atalokba sülen “Indian army commandos” purtemi Myanmar arrtsülen telongpur tesep ana tashi amak aser iba mapang telongpurtem kar khaset aser kar yiruja liasü.
NSCN(K) telok ya India den yimjung nung liasü saka taküm küm March nungi yimjungji raksa aser Northeas nung aliba telongpurtem telok den longjemer telok tasen ka tenüng agi ‘United Liberation Front of South East Asia’ küma lir.
NSCN-K lenirtem anema NIA-i Indian Penal Code, Arms Act aser Unlawful Activities (Prevention) Act nung ajemdaker ken o aika agüja lir.