NSCN (K) town commander apuba osangji tiyazü: Kinüngertem

Dimapur, August 16 (TYO) : August 15, 2015 nü osangkaket kar nung NSCN (K) town commander Maj Kisheto Ayeh August 3 nü Tsiesena Basa Kohima anasa apu ta asübaji tiyazü ta par kinüngertemi sangdong ka nung metetdaktsü.
PRO IGAR (N)-i Kisheto Ayeh Kohima nung apu ta sangdongogo saka shitakbajibo pa July 31 nü Zunheboto district kübok Sukhalu yimtsüng nung aonung 7:30 meta apu, ta kinüngertemi ashi.
Pa Tata Mobile gari ka nung mener Kohima nungi Zunheboto-i aodang len tom nung apu aser pa apuba mapang pa ket nung prangpong-injang kecha bena maliasü, ta Kisheto’er kinüngertemisa sangdong nung shia lir.
Iba ama osang tiyazü sangdongba ajanga sepaitem tajangzük kecha mangutsü saka parnoki tamajung bilema inyakbatem ang tali jungkai adoka sayur. Sepaitemi Kisheto Ayeh dak taochi melii reshikangshiba mapa onoki kukua aitsür, ta Kisheto’er kinüngertemisa sangdong nung metetdaktsü.