NSCN nungi linük tenzükertem sarasadem süngzü sentong agitsü

Dimapur, August 13 (TYO): Tanela Temeshii melungba aser Collective Leadership-i melungba ama Council of Nagalim Churches-i anogoshia anüngdang 11:00 ako nungi 12:00 ako tashi sarasadem süngzü (Chain of Prayer) ayongzükogo, ta NSCN nungi linük tenzüker ajak dang sangdonger, ta tanü CNC General Secretary, CNC Rev. Seksim Kasar-i sangdong ka ajanga metetdaktsü.
Iba sentong ya August 18, 2017 nü CHQ Church nung tenzüktsü, aser iba sentong nung Dimapur aser temeket nung alirtem aser Peren district nung alir linük tenzükertem ajak adentsüla, ta sangdong nungsa shia lir.
Kasa anogo aser mapang nung GHQ nung Army tema tenzüktsü aser Head Chaplain-i Army Units ajak atema sentong lemzüktsütsü.
Iba sentong omenji “‘Tashi agi masü, mesüra ain agi masü, saka Kü tanela agi,’ ta Temeranger KIBUBAI ashir.” (Zechariah 4:6) asütsü.
“Iba sarasadem sentong ya talisa yimtenren ken o tekaraba nung latettsü atema lir. Tanü tashi Tsüngremi asenok len ania aruba atema tang mapang ya Pa nem tenüngsang agütsütsü mapang ka lir. Iba mapang ya asenoki Tsüngrem tsüngdang ajemalur kanga nendaka sarasademtsü mapang ka lir. Tangartem teimla samaa sarasadem anener liaka, asenokibo yamaji masütsüla. Asenoki Pa dang pelatsüla aser Pa dak rangloktsüla. Iba mapang ya asen temenentem nangzüka temeshiba lenmang bushia Tsüngrem taochi bushitsüla,” ta Rev. Seksim Kasar-isa metetdaktsü.
Tongtibang sarasadem onüktem:
1. Nija temenen aser linük/nüburtem temenen nangzüktsü.
2. India-NSCN ken o jembia tekaraba nung telemtetba ka dangi arutsü atema Tsüngrem dang teyari meshitsü.
3. Naga Chief Negotiator, Th. Muivah aser Indian Interlocutor, R. N. Ravi na atema temoatsü meshitsütsü.
4. Indian Prime Minister aser Cabinet Minister tem atema temoatsü meshitsütsü.
5. NSCN nung Collective Leadership aser Home Authorities atema temoatsü meshija sarasademtsü.
6. India sorkar aser People’s Republic of Nagalim atema sarasademtsütsü.
Civil Set-Ups (Ministry & Department) atema: Tsünglanglen aliba ama anogo sasep nung lir. CNC staff tem sentong ajak nung adentsü. Tanüngba Ministries, Departments aser Regions atema anogo ishika tsüngda sangdongtsü.
DAY 1 : August 18 nü Dimapur aser Peren Districts aser temekettem nung alir linük tenzükertem ajak CHQ Church, Hebron nung sarasadem sentong tenzükba sentong nung
adentsüla.
DAY 2 : August 19 nü (Honibar) Central Secretariats staff (OA-III to full Secretary) ajak.
DAY 3 : August 20 nü (Deobar) CNC Staff aser Sunday school tesayur ajak.
DAY 4 : August 21 nü, (Hombar) Steering Member aser Steering Secretariat ajak.
DAY 5 : August 22 nü, (Mongolbar) Tatars aser Tatar Hoho Secretariat ajak.
DAY 6 : August 23 nü (Bodhbar) Kilonsers aser portfolio maliba Deputy Kilonsers ajak.
DAY 7 : August 24 nü (Brihostibar) Kilo Ministry den parnok Secretariat staff.
DAY 8 : August 25 nü (Hokolbar) Chaplee Ministry den parnok Secretariat staff.
DAY 9 : August 16 nü (Honibar) Mines & Mineral Ministry den parnok Secretariat staff.
DAY 10 : August 27 nü (Deobar) Medical & Health Ministry den parnok Secretariat staff.