NSCN (R)-i tekümdangtsü metetdaktsür

Dimapur, Yimpoksüi/November 29 (TYO): Khristmas benjung mongpu atongba nung ajemdaker nisung tamajungertemi maongka agir, aser nisung tamajungertemi NSCN (R) tenüng amer UT1 Areas aser telongtet nung Khristmas donation sarur, ta NSCN (R)-i angazükogo, ta NSCN/GPRN (Reformation), MIP (Ministry of Information & Publicity)-i sangdong ka ajanga metetdaktsü.
Iba dak sendakba nung Supervisor, UT1 Khekato Kinny (Kilonser)-i MIP ajanga nüburtem dang, item (donations) atema tetuyuba magutsü, mesüra magutsütsü, ta metetdaktsüogo.
UT1-isa MIP ajanga item ama mapa inyakertem dang tangsa anentsüla ta tekümdangtsü metetdaktsüba den külemi shishilembar ajak dang amalitepa inyaktsü aser item ama maparen atalokra 9862746931/ 9485205557 ajanga UT1 Supervisor nem osang metetdakjang, ta metetdaktsüogo.
NSCN (R) MIP-isa, nisung kari danga tiyazü nung NSCN (R) tenüng amer item maparen inyakdang pura, mesüra NSCN tenüng menüktsüra temerenshi tulu agutsütsü, ta metetdaktsü.
Iba sangdong agutsüba sülen-a Business Personalities/Groups/Party(s) kari dang item ama ozüng alema inyakba mapatem inyakdaktsüra ibajibo pei khuret asütsü aser itemji ajanga NSCN (R) tenüng memenüktsütsüla, ta kasa sangdong ajangasa metetdaktsüogo.