NSCN (R)-i tekümdangtsü sangdonger

Mokokchung, March 27 (TYO): Mokokchung town aser temeket nung nisung tamajunger aikati NSCN officials ama ‘Information Slips, Demand letters agütsür aser saru sarur’, anungji NSCN (R)-i MIP ajanga tekümdangtsü osang metetdaktsür, ta tanü MIP NSCN/GPRN (Reformation) sangdong ka nung metetdaktsü.
“NSCN (R)-i item ama mapa inyakbaji süoki ia agitsü, anungji item ama nisungtem dang item mapaji tangsa anentsü aser meinyaktsü tekümdangtsü metetdaktsür, mesüra temerenshi tulu agütsütsü,” ta sangdong nung shia lir.
“Item ama nisung tamajungertem ajangshira Ao Region Supervisor, Nokrang Lanu Aier den 6909249002 ajanga aser Chairman (Ao Region) Temjen Ao den 9862850449 ajanga tongteprateptsü metetdaktsür,” ta kasa sangdong nung shia lir.
Iba sangdong metetdaktsüba sülen-a temalen shia aliba ketdangsertemi memeteti senotsü agütsütepra ibaji pei khuret dang asütsü aser iba jagi NSCN (R) tenüng memenüktsütsüla,” ta parnokisa metetdaktsüogo.