NSCN-R indang CFSB office lapoktsü atema ashishiteper

Dimapur, Dec. 2 (TYO): Padumpukhuri nung NSCN (Reconciliation)-i Ceasefire Supervisory Board (CFSB) office lapoktsü atema Ministry of Home Affairs-i mulunga agizükogo saka GPRN/NSCN (Kitovi- Khole)-i iba office lapoktsü memulunger ama angazüker.
CFSB office lapoktsüba tesemji NSCN-R ketdangser ka indang ki lir aser Hombar nikongtsütsü NSCN-R züngsemtem office mesemteti aru. Ajisüaka NSCN-KK-i iba office lapoktsü memulunger aser parnoki NSCN-R dang kimung toktsür aotsü tetuyuba agüja telok ana tsüngda mangatettep adok, ta osang ajangasa angazüker.
Mongulbarnü district administration, police aser Padumpukhuri village council züngsemtemia telok ana tiyongtsüi ia parnok angatettepdaktsütsü merang saka iba ken o ano metembangteti lir.
NSCN-R, CFSB züngsem Newell Sumi-i ashiba agi, Home Ministry-i Padumpukhuri nung Ceasefire office lapoktsü mulunga agizükogo aser security forces (army)-ia Mongulbarnü iba tesem semdangogo.
Iba office lapokba nükjidongji Naga nunger den tesentaktep tajungba ayutsü atema lir, kechiyong onok Naga nunger taginüba atema rarar. Tanga Naga Yimten teloktemi mulunga agizüker süra kechiba GPRN/NSCN (KK)-i onok noktanger. Onoki parnok den tsükchitep kecha mali aser mangatettep kar lira, itemji tashiyim agi masü saka tajungleni angatetteptsü akok, ta Newell Sumi-isa ashi.
Mongulbar aonung NSCN-KK-i injang pungu shi kahtok aser Bodbar tashi nung onoki kimung toktsür aotsü tetuyuba agütsü, ta paisa shisem.
Padumpukhuri Village Council-i ashiba agi, parnok kin/kidong telemsa kecha melii nisung ajak yimjung nung putepa alitsü atema inyaker aser yimtsüng telongtet nung tensa raksatsüba inyakyim magizüktsü.
Padumpukhuri yimtsüng nung CSFB office lapoktsü atema parnoki NOC kecha magütsü aser iba dak sendakba osang Council dangi kecha maru, ta Padumpukhuri Village Council züngsemtemisa metetdaktsü.
Osang angazükba agi FNR telok ka tesem tonga oa telok anaprong dang tajunglen agi angatetteptsü mepishi.