NSCN (R) Kilonseri jangjashitsür

Dimapur, August 21 (TYO): NSCN (Reformation) Defence Kilonser aser Supervisor UT1 Khekato Kinny-i NSCN/GPRN (Reformation) MIP sangdong ka ajanga, August 16 nü tatalokba nung NSCN(IM) nungi Maj.Toishe khasetba nung pai kecha shilem agia mali, ajisüaka pa nem tai tongloktsüba atema sasar, ibayongji August 20, 2019 nü NSCN(IM)-i pa aser ozü kibong amaktsüsa aküm, ajisüaka Tsüngrem taochi agi kecha meyirui kümzük, ta metetdaktsü.
“Atangji nungbo NSCN- IM-i apuba nisung karji (melung malemba) NSCN (IM) nungisa lir, anungji komaser iba nungji ni adentsü????. Maj. Vishiho ji (melung melemi pua alir rongnung ka) NSCN (R) nungi masü,” ta MIP sangdong nung shia lir.
“Ita ishika tejaklen (IM) nungi Maj. Vishiho ‘leave’ nung aliba mapang ozü Vice President dangi arua pai NSCN (R) nung denner ta ashi, ajisüaka pa (Vishiho) ‘Drug Addict’ asübayong ozü VP-i magizük. Iba sülen pa (Vishiho) kü dangi arua pa telok nung agizüktsü atema temaba ketdangsertem den jembijang ta kü dang asüngdang, ajisüaka temaba ketdangsertemi agiba telemtetba nungjisa alatsü ta tangatetba nung ni magizük. Anungji kechi kuli ajanga südir süaka Vishiho ji (tepsetba nung denaka mesüra dena meliaka) NSCN(IM)-i apu, aser tang tashi NSCN(IM) züngsem ka (toktsür mesüra leave nung lir mesüra tanga kuli), anungji Toishe tepsetba tatalokba nung koma ser ni adentsü?” ta kasa sangdong nung shia lir.
“NSCN(R)-i Vishiho magizük, anungji NSCN (R) dang jashiba ajanga pai telok tenüng menüktsütsü atema inyak asütsüa akok. Anungji Tsüngrem tenüng nung ni (MIP ajanga) ajak dang ya jangjashitsür, tia makai Maj. Toishe tepsetba nung ni kecha shilem agia mali. Tangatetba tajung aliba telok ka ama ni NSCN(IM) dang ni shilem agia lir, ta ashitsüsa kuli tejangja sayutsü/agütsütsü mepishir, ajisüaka melung malemba nung ajemdaker tai metongloktsütsüla. Kechi kuli ajanga Toishe tepset südir süaka ni, (mesüra iba onük nung) NSCN (R)-i shilem agia mali,” ta sangdong nung shia lir.