NSCN (R) puri sarusajir 4 apu

Dimapur, Chiteni/July 12 (TYO): NSCN (Reformation) UT1 Authority-i tawa NSCN züngsem ama Dimapur nung saru sarua senzür kar puogo. UT1 Supervisor aser Kilonser Khekato Kinny-i ashiba agi, mapang shia ozüng alema inyakba maparen angazüka aruogo saka MIP ajanga dang media ajanga ibala inyakyim nungi pilaa alitsü atema parnok nem tekümdangtsü metetdakja aru. Ajisüaka onoki azüzüka aser atasaa inyakba sentoka toktsür parnoki maneni inyaksangshi nung onoki jenjang tapet agitsüsa aküm.
Pua alritem rongnung Yehemi yimtsüng nungi Luveshe Ayemi’er jabaso Khekivi Ayemi (lenir), V.K. yimtsüng nungi Tohoshe Kiba’er jabaso Kibovi Kiba, Hekheshe yimtsüng nungi Hokhuvi Yepthomi’er jabaso Angukavi Yepthomi aser Pimla yimtsüng nungi Khashevi Awomi’er jabaso Kitoka Awomi nunger densema lir.
Maneni ozüng raksar kar lir, aser parnok jenshia senzüdar, ajisüaka NSCN Authority-i parnok aputsü atema jenjang agidar. Aibelena alir kinungertem aser yimtsüng nung ketdangsertem dang, parnok tanaben pura NSCN Authorities-i merenshitsü aser iba nungji tasüba agi merenshitsü densema lir, koba onokia mataloktsü sarasadema atar, ta sangdong ajangsa metetdaktsü.
NSCN (R) puri maneni nüburtem aser shishilembartem dang teka amteper inyaktsü aser iba amala ozüng raksaba maparen kar danga metetra item number; 9862746031/7085620240 tem nung ketdangsertem den tongteprateptsü mepishir, ta NSCN/GPRN (Reformation) MIP sangdong ka ajanga metetdaktsü.