NSCN-R teloki “Peace Accord” agizüker

Dimapur, Sept.06 (TYO) : August 3, 2015 nü Delhi nung NSCN-IM telok o India sorkar na Naga yimten tebilemtsü ken o tatembang küma latettsü asoshi yimjung tangatettep ken o (Peace Accord) renemba nung parnokia nungiter ta NSCN-Reformation teloki metetdaktsüogo.
August ita nung iba yimjung ken o renemba sülen Naga nunger linük tenzükertem teloktem rongnung mezüngbuba NSCN-R teloki iba yimjung ken o ji nungita ola adoker. Ajisüaka, ano parnokisa ashiba agi, iba yimjung ken o jembibaji ajaki meteta jembitsüla aser ajak nungi shisatsü agia inyaktsüla. Naga yimten ken o tatembang küma latetbaji ajaki agizüktettsüla ta NSCN-R lenirtemi metetdaktsü.
Onoki R.N.Ravi ajuruogo aser pa ajurubaji tajangzük liasü. Paji linük nung yimten ketdangser tain aser tashitemetetter ka asünungji, pa ya Naga yimten ken o jembiba nung shilem agitsü tetemsü nisung ka lir ta NSCN-R tir Wb.Wangtin Nagai metetdaktsü.
NSCN-R lenirisa ashiba agi, ato kilonser Narendra Modi ya kanga tashitait yimsüsür ka lir aser tangbo India nunger lenirtemi Naga nunger yimten temeten otsü ya angateta lir aser iba tebilemtsü ya kokteta jembitsü asoshi ajaki shilem agidagi.
Ibai Naga nunger asoshi mapang tajung ka lir, anungji ajaki ajemalua pei asoshi dang mebilemi yimkong ajungtsü bilema Naga yimten tebilemtsü ya telatetba kati arudaktsütsüsa khuretsa bilema inyaktsüla ta NSCN-R lenirisa metetdaktsü.
India tenüng nung Naga nunger linük tenzükertem den Naga yimten tebilemtsü latettsü asoshi jembitsü shimtetba nisung, R.N.Ravi den ajurua jembir NSCN-R lenirtemji Wangtin Naga den NSCN-R nung tongti zülur Wb. P.Tikhak aser Imlongnukshi Chang, Wangpai Konyak aser Abuan Zeliang nungertem liasü.
Parnok den jembidang, R.N.Ravi-i ashiba agi, Naga yimten tatembang küma latettsü asoshi Naga nunger ajak den shisalemsateptsü aser iba telatetbaji NSCN-IM kisüng den latetba ken o masü saka Naga nunger ajak den renemba ken o ka asütsü.