NSCN (R) tenüng amshia sen sarur

Dimapur, February 13 (TYO): NSCN (R) tenüng nung nisung kari dokan aser shishilembartem nem ‘Information Slips & Demand letters’ agütsür ta osang angazüker. Iba mapa inyakertemi NSCN ketdangser tenüngtem amshir aser parnok ama inyaksangshir, ta MIP (Ministry of Information & Publicity) NSCN/GPRN (Reformation)-i metetdaktsü.
Iba inyakyim ajanga NSCN (R) dang masü saka ketdangsertem tenüng menüktsür. Anungji item nisungtem dang mapa inyakba anentsü metetdaktsür mesüra timtem tulu ajurutsü, ta MIP-i ashi.
NSCN ketdangsertemi nisung shinga nema shishilembartem aser dokantem dang 2019-2020 atema ‘Legitimate Taxation’ sarutsü tetuyuba magütsü. Anungji, shishilembar aser dokan kiburtemi 9862746931, 9366074244 aser 7005184377 phone number nung osang metetpelatsü metetdaktsür, ta MIP-isa ashi.
Iba tekümdangtsü osang sangoktsüba sülen shishilembar aser dokan kiburtemi tax agütsüra, ibaji pei nija indang khuret asütsü. Iba mapa ya NSCN (R)-i inyakba mapa masü aser ‘Legitimate Taxation’ indang Revenue File nunga tenüng mezüluoktsü, ta MIP-isa shisem.