NSCN-Reformation züngsemtemi NSCN-K nung tanaben dener

New Delhi, October 20 (Agencies) : India sorkar aser Naga nunger yimten teloktemi parnok anema mapa inyakba atema NSCN-Reformation (NSCN-R) züngsem kari tanaben NSCN-Khaplang den adentsü telemtetba agiogo. Iba ya ajanga ‘Naga peace accord’ nung tetsükdaktsü bener arutsütsü amai bilemer.

NSCN-R ya NSCN-K nungi balaka razüka orr tentetba telok lir aser parnok tongti ketdangser kati ashiba agi, Assam Rifles-i mozü shibelener aser tashiyim agi sen sarur ta tiyazü nung par züngsemtem apur.

Anosa, NSCN-IM aser NSCN-Unification natia mozü shibelenba aser tashiyim agi sen saruba otsü tiyazü yanglua par züngsemtem apur, ta NSCN-R ketdangserisa ashi.

“India nunger sepaitem aser NSCN (Isak-Muivah) o NSCN (Unification) nungertemi parnok reshikangshiba ajanga ozü züngsem karbo tanaben Khaplang den adentsü atema Myanmar-i ogo. Onoki iba inyakyim noktangtsü meranger saka ozü telok anema inyaksangshiba ajanga züngsemtemi iba amai inyaktsüsa akümer” ta ketdangseri IANS osangbener dang ashi.

NSCN-Khaplang nung tongti ketdangsertemi NSCN-R züngsemtem tanaben parnok den züngsemba pela agizükogo ta IANS-i osang tejangja angazükogo.

Taküm August ita National Socialist Council of Nagalim (Isak-Muivah) aser Narendra Modi’er sorkar tsüngda Naga peace accord tenangzükba agi.

Naga peace accord nangzüktepba sülen NSCN-Reformation züngsem 50 den timba puogo aser parnok rongnung Assam Rifles-i Manipur aser Nagaland nung nisung teranana aser Arunachal Pradesh nung trok apu, ta osang angazüker.

Ano, osang ajangasa ashiba agi, taoba ita tu sepaitemi Nagaland nung NSCN-R züngsem ka kahset.

“Naga yimten tebilemtsü ya kanga dang tasak aser teratatsü ka lir. Tawa telok kar aser sorkari iba onük atema tim mesüi inyaker aser iba atema Naga nungertem temulung yirudaktsür. Onoki India sorkar den yimjung nung alitsü tenangzükba agiba sülen onoki India sepaitem anema mapa inyak nungbo, onoki tenangzükba anema inyaker ta aitsütsü, süra kuli kecha melii ozü züngsemtem apuba atema shibai telangzüba agütsütsü” ta NSCN-R ketdangserisa IANS dang ashi.

Iba ketdangser ya NSCN-Reformation nung madendang NSCN-Khaplang nung küm aika dena aruogo aser pai ashiba agi, parnoki ozüng alema inyak nung dang sepaitemi parnok anema inyaktsüla.

“Ozü züngsemtemi sepaitem mesüra tanga NSCN teloktem anema mapa meinyaktsü meranger, süra kechiba parnoki onok anema inyaker. Kechiba ozü züngsemtem apur aser tepseter? Iba ama tensa ka nung ozü züngsemtemi NSCN-Khaplang nung tanaben oa adentsüsa akümer aser iba atema onok dak tai tongloktsütsü madoker” ta paisa ashi.

Naga peace accord pusema nungiter ta NSCN telok kati mezüng sangdongbaji NSCN-Reformation lir.

NSCN-R chairman Wangtin Naga, general secretary P. Tikhak aser senior lennir Imlong Chang nungertemi Naga peace interlocutor, R.N. Ravi den ajurutepba sülen parnoki Naga peace accord pusema nungitba osang metetdaktsü.

NSCN-Reformation ya taküm küm tetenzüklen tentet aser parnok züngsem 2,500 shi lir amai bilemer.