NSCN Vice Chairman aser General Secretary küm 6 atema shimshi

Dimapur, March 22 (TYO) : March 22, 2017 nü Council Head Quarters, Hebron nung National Socialist Council of Nagalim (NSCN) Council senden ka amendang NSCN züngsem 3000 den tema aden, ta MIP/Hebron sangdong ka nung metetdaktsü.
Senden nung züngsemtemi Vice Chairman Gen. (Retd) Kholi aser General Secretary Th. Muivah küm 6 kümsük atema inyaktsü shimshi aser tenaprong nem National Judiciary Board (NJB), Convener, Domai Dani Saheni-i tenangzükba agidaktsü, ta sangdong nungsa shia lir.
Senden nung Council of Nagalim Churches (CNC) nungi Reverend temi lennir ana nem Tsüngremer temoatsü meshia sarsademtsü. Maneni, senden nung adener NSCN züngsem ajaki Tsüngrem aser nisung tsüngdang, tatem tashi linük atema inyaktsü aser NSCN indang council Collective Leadership tangatetba sülen anidaktsü tenangzükba agishiogo, ta MIP/Hebron-isa metetdaktsü.
Senden nung tanga onüktem benoka olemtep aser senden amenba tamaitsü nung ‘The Line of National Socialist Council of Nagalim’ ta ser kaket tila ka saya. Iba kaket ya Ministry of Information & Publicity (MIP) ajanga adoka alemer, ta sangdong nungsa shisem.