NSCN wako Dima Hasao nung angu

Silchar, June 24 (Agencies): Maibang nung National Socialist Council of Nagalim- Isak Muivah (NSCN-IM) telok indang wako aser poster anguba ajanga Assam hill district, Dima Hasao nung tsübutep.
NSCN (IM) nükjidongji Nagalim (Greater Nagaland) kümtettsü lir, iba nungji Assam, Manipur, Arunachal Pradesh nung Naga nunger aliba tesem ajak den Myanmar nung tesem kar lir, aser itemji Naga nunger li ta züngshir.
NSCN-IM wako aser poster ka ajanga ‘Greater Nagaland’ akhangbaji Bodhbarnü Old Maibang tesem nung aliba railway apu ka anasa angu. Iba osang angashili police iba tesem jagi oa itemji agien.
Brihostibarnü Dima Hasao headquarters, Haflong nungi ketdangser kati, bushisüngdang ka tenzükogo ta metetdaktsü. Iba atema nisung shinga pua mali.
Ketdangserisa, Bodhbar aonung sepaitemi iba tesem nung mita senzü ta ashi. Iba wako aser poster ji anepdang züngia songa yutsü südi ta bilemer. Ajisüaka iba district nung aliba nisungtem tebilemtsü akar.
Dima Hasao district nung Dimasa tentet tuluba, Jadike Naiso Hosom (JNH)-i iba atema aibelenertem aputsüla ta takhangba agütsüogo.
JNH Tir, Kalyan Daolagupu-i, parnoki district administration aser police ketdangsertem dang nüngdakba meratem agitsü atema temepishiba shidi ka agütsütsü, ta ashi.
NSCN (IM)-i sayaba Nagalim map nung Assam nung Karbi Anglong aser Dima Hasao district na dena lir.
Map nungsa Golaghat, Sibasagar, Dibrugarh, Tinsukia aser Jorhat district tem nung shilem kar densema lir.