NSCN/GPRN-i Naga nunger ayongzüker

Dimapur, July 3 (TYO): Naga nunger pei sasa liyonga aotsü temeten angutsü atema rarayonga aruba mapa nung Naga nungertemi shilem agiba aser moatsüba ajanga tanü tashi onok noktaka lir aser iba atema kanga pelar, ta N.S.C.N / G.P.R.N Deputy Kilonser, Imti Imchen-i tanü metetdaktsü.
Myanmar sorkari 2012 küm NSCN/GPRN dangi arur aser ceasefire tenangzüktep ka agitsü atema asüngdang aser onoki nübortem atema tajung ta amanga aser iba tangatetba nung ceasefire alitsü molunga agizük, ta Imti Imchen-i sangdong ka nung ashi.
Ajisüaka, India sorkari Myanmar army nem senotsü aser prangpong-injang agüja Myanmar sorkari Taga nung Council Headquarter amak. Myanmar army-i anaben tashi General headquarter mi agi rongdoktsütsü merang saka Naga army-i yimjung aginüba agi parnok anema kecha meinyak, ta paisa metetdaktsü.
Myanmar Army-isa Konyak region kübok civilian aliba tesemtem nung bomb poklokja injang khaloktsü aser Laison office, Khamti nungi Peace Committee züngsem 5 apu. Parnokisa Konyak region headquarter aser 3rd Brigade headquarter rongdoktsü, ta Deputy Kilonser-isa shisem.
Onoki 1956 Plebiscite nung ameta lir aser Myanmar sorkar indang Nationwide Ceasefire Agreement (NCA) magizüker. President lenisüba kübok onok tashi itta lir aser pa lenisüba kübok tashi taitba küma aoer. Bendanga agütsüba Naga nungertemi posema nungitba aser sarasademtsüba ajanga onoki akangakanga noktaka lir, ta paisa metetdaktsü.
NSCN/GPRN sorkar nung deputy CNC Lt. Gen. Nikki Sumi ama western, southern, northern regions den eastern sectors nungi lennir tajungtem aika dena lir, ta paisa ashi.
“Onoki iba rara tenzükba mapang western region nungi Naga pioneer temi Naga nunger dang “One Sovereign Nation” ka kümtettsü nangzük, anungji tang iba tenangzükba kong lir? Nisung kar dak alaka western region nungi adianutemi kechiba anüdoklen alirtem toktsür ao?” ta Imti-i sangdong nung shia lir.
Asenoki Tsüngrem tsüngdang eastern, western mesüra southern Naga nungertem ta mebendangli. Naga army-i kechi ajurudir ajuruang raratsü renema lir aser onok aremzükba ya tashimaitba ama mebilemtsüla, ta paisa ashi.
Naga linük indang teyari aser sarasadem medeni onoki mapa inyaka moutettsü. Talisa iba ama tensa tamajung mapang nenok dang nungi aria bilemtsüba, temeim aser sarasadem kanga nüngdaker, ta Deputy Kilonser-isa sangdong nung metetdaktsü.