NSCN/GPRN-i nija hostel aser tuition fee atema tuyur

Dimapur, August 29 (TYO): Nija hostel lapokba aser tuition agiba nung tim masüba inyakyim aika inyakba atema Ministry of Kilo Affairs-i tesayurtem atema teinyaktsü aser meinyaktsütem kar latettsüogo, ta MIP, NSCN/GPRN sangdong ka nung metetdaktsü.
Hostel aika nung kaketshirtem nem nüngdakbatem magütsür, takdang shitak magütsür, hostel kar nung nisung onsara anioker, metsümeshidak peria maliba den electrical lightings majung. Ano, hostel kar nung warden mali, temzüng & teinyaktsütem shitak yanglua mali. Külen tesayurtemi private tuition atema taa sen 3000 nungi 4000 tashi agir. Iba ya ajanga sensaker kaketshirtembo tuition agitsü makoker, ta sangdong nungsa shia lir.
Item inyakyim ya kanga dang tim masü aser magizüker, anungji Secretary, Ministry of Kilo Affairs-i nisung ajak aser talisa kaketshirtem ajungtsü atema kümdangtsü tetuyuba agütsür.
Kaketshirtem ayuba hostel temi kaketshirtem kechisarena nung renloktsü atema nüngdakbatem ajak peria agütsütsüla aser hostel temji meinprong balala nungi jenbua alitsü atema lokti aliba tesemtem nungi pilar lapoktsüla.
Tesayurtemi kaketshirtem dang sayur aser parnok nem iba atema itasen agütsür. Ajisüaka, tesayurtemi tuition magitetba kaketshirtem nem timtem magütsütsüla. Anungji, tesayurtemi classroom nung tuition agidang subject ka nung sen 500 dak tali magitsü aser home tuition nung subject ka nung sen 800 dak tali magitsü latettsür. Iba tetuyuba alema inyakertem putetra ozüng tapet agi merenshitsü, ta MIP sangdong nungsa metetdaktsü.