NSCN/GPRN nungi lenir ka anen

Dimapur, August 06 (TYO): Deobarnü NSCN/GPRN nungi tongti lenir kati pa kilonser menden nungi anenba aser GPRN züngsem nungia anenba osang metetdaktsü.
Tanü Dimapur nung osangbenertem den jembidang NGOs & Public Relations kilonser, Akato Chopy-i, pa nija nüngdak aliba ajanga anener, aser tang tashi nungbo pa Naga yimtenren telok kecha nunga adentsü tebilemba mali, ta metetdaktsü.
“Tarutsü nung kü nübo nüngdakra ni Naga linük tenzüktsü melunga lir,” ta paisa shisem.
Akato anenba ajanga tapok apatsüa akok, kechiyong November 23, 2007 nung unification movement atema inyaker tongtibang nisungtem rongnung pa densema liasü, iba mapang nung NSCN teloktemi longjemtsü lemtet aser NSCN/GPRN sabang ka kübok longjemtsü sangdonga liasü.