NSCN/GPRN (R)-i CFSB/CFMG Chairman den ajurutep

Dimapur, Rongjui (September) 7 (TYO): September 7, 2018 nü NSCN/GPRN (R)-i tawa tasen shimba CFSB/CFMG Chairman, Lt. Gen.Shokin Chauhan AVSM, YSM, SM, VSM (Retd) den ajurutep.
Iba senden ya Staff Officer T.Mere (Dy. Commandant)-i yaria amen. Senden nung tanga onük balala kecha mejembi saka Chairman-i yimjung alitsü atema NPGs den yaritepa inyaksangshia aotsü jangraba metetdaktsü.
Ceasefire dak sendakba nung ken o kar adokdang pa den lemsateptsü atema ashi aser sendaktepa alirtem ajak yaritep nungang khurettem angatetteptsü akok ta paisa ashi.
Senden nung NSCN (R)-ia yimjung aginüba metetdaktsü aser yimjung atema akokba tashi yariteptsü ta ashi.
Shiameteter aser aika ajangshia aruba nübo kati Chairman mapa inyakba atema kanga pelar ta NSCN (R)-isa metetdaktsü.
Chairman Lt.Gen(Retd) Chauhan ya aiben Northeast State tem nung aser talisa Nagaland nung mapa inyaka aruba nübo ka lir aser pai iba mapa inyakba ajanga tajung temelenshi aika bentsür arutsü imlar, ta parnokisa ashi.
NSCN(R) teshimtet telok nung Kilonser Viniho Kiho (Co-Chairman CFSB), Kilonser Newell Achumi (member CFSB), Toshi Longkumer Secretary (CFSB) aser MIP (I/C) Amento V.Chophi (Tatar) nungertem liasü aser parnoki Chairman CFSB/CFMG nem Sumi Vest Coat ka sempet agütsü, ta MIP (Ministry of Information & Publicity) NSCN/GPRN (Reformation) sangdong ka nung metetdaktsü.