NSCN/GPRN teloki ACAUT aitsür

Dimapur, June 12 (TYO) :  ACAUT telok ya Naga nunger yimten nüchiso bushiba maparen nung telemsa adokdaktsütsü aser nüchiso bushiba maparen anendaktsütsü atema inyakba telok ka lir, anungji kodaser iba ama teloki linük tenzükertem anema inyakba mapatem aremzüktsü ta tanü NSCN/GPRN sangdong ka ajanga metetdaktsüogo. Iba telok ya nisung kari linük anema tentetba telok ka lir ta parnokisa aitsü.
Parnok ya miima dang India nunger ketdangser tulurtemi aser retired Indian army General-temi senotsü agüja yarir, item jagi tang India den Naga yimten  ken o jembiba maparen ya raksatsütsü meranger ta NSCN/GPRN telokisa metetdaktsü.
Tamalen 2013 küm NSCN teloki osang kaket ajanga ACAUT telok arutsüba mapang, mezüngbuba ACAUT telok asoshi puküma nokdaksangji taoba CFMG nung mendenbuba Maj. Gen. (Retd) N. George liasü ta NSCN telokisa ACAUT aitsü.
Taoba mapangtem nunga Naga nungertemi British nunger anema rara aser parnok nem dang masü saka India nem dena saru magütsüi anema apuso. Iba denji Naga nungertemi India nunger mekümnüba agi India nunger election magidaktsüi nokdanga aru ta NSCN/GPRN telokisa metetdaktsü.
Tanüa iba kasaji, India o Naga nunger na tsüngda yimten ken o jembibaren nung takok angutsü asoshi,  Naga nunger MLA ajaki India temzüng kübok tenangzükba agia liakasa, kodang Naga yimten telatetba kati arudir, idangjisa menden aitsütsü tashi telemtetba agia lir. Ibaji Naga yimten otsü nung tapak tongtibang ka asütsü ta parnokisa ashi.
Ajisüaka, tang ACAUT teloki Naga yimten nung bendanga agüja raraba otsütem aser telatetba tajung kati arutsüba teimlatem samadaktsütsü asoshi inyaker ta NSCN telokisa aija metetdaktsü.
Joko tangbo ACAUT teloki Naga nunger nem ozüng dang agütsür, ibayongji Wokha district nung VDB purtem nembo anogo tenet tsüngda inyaktsü den mapa lemzüktsüba osang angazüker, saka NSCN teloki iba amaji inyaktsü memelatsü ta parnokisa metetdaktsü.