NSCN/GPRN teloki aitsür

Dimapur, June 01 (TYO) : KNF(N) teloki NSCN-IM telok nung Steering Committee member Wb.Khailun Haokip pua bener oa reshikangshir tepsetba mapaji kanga sashia aitsür ta NSCN-IM teloki metetdaktsüogo.
KNF(N) teloki Khailun Haokip ya Kuki nunger yim ka tenüng agi Shijang nung lia pua bener ao, anungji pa pua bener oli NSCN teloki KNF(N) telok dang pa dak kecha tamajung meinyaki chioktsü metetdaktsü aser ano Kuki aser Naga nunger lokti tentettemia paji taküm tajung chioktsü mepishia metetdaktsü.
Ajisüaka, iba temepishiba olaji mangai KNF(N) teloki Khailun Haokip reshikangshir tepsetba mapaji tapet mapa ajanga meyipa agütsütsü ta NSCN/GPRN telokisa metetdaktsü.
Khailun Haokip ya 2008 küm NSCN/GPRN nung züngok aser kanga temulung lemteta inyakba Steering Committee Member ka liasü. Pa ama ka taküm samabaji temelen angutsü kanga tasak asütsü ta asür kinungertem den mangyim jashi lemsatepba sangdong ka nung NSCN/GPRN teloki metetdaktsü.
Pa tasümang nguteta bener arua asür kinungertem nem agütsütettsüsa timtem jenti agia inyakba asoshi Naga aser Kuki nunger lokti tentettem dang kanga pelar ta parnokisa metetdaktsü.