NSCN/GPRN teloki Okram Ibobi Singh mapa aitsür

Dimapur, Oct.27 (TYO): Tan Hombar nü Ukhrul nung Manipur Chief minister, Okram Ibobi Singh-i mozü ki ka den power station ka lapoktsütsü sentong liasü saka iba sentongji magidaktsüi nübortemi nokdangba sülen pai Imphal nung alir Naga nungertem ki mita odaktsür aser nisungtem pudaktsür ta NSCN/GPRN teloki aitsüogo.
Ukhrul nung nübortemi Ibobi maksüa meyipa yokba sülen, Imphal nung Bethany Hotel nungi nisung ka tenüng agi Phaningkhui Kapai Imphal West Police Commondos purtemi paji NSCN kilo kilonser, Ahao Raising den inyaker ta tai tonglokja apubaji khenyongi tai, kechiyong paji NSCN nung inyaker masü aser ato kilonser dena meinyaker, ibaji NSCN kilo kilonser tenüng menüktsütsü asoshi inyakba mapa dang lir ta parnokisa aitsü.
Ibobi Singh-i Naga nunger anema inyakba mapatem anentsüla aser pua alir nisungtem ajak yaktasa chioktsüla ta NSCN/GPRN telokisa metetdaktsü.