NSCN/GPRN yaruiwo asür Isak Chishi Swu mang tanü Dimapur atongtsü

Dimapur, June 29 (TYO) : Naga nunger lennir, NSCN-IM Chairman/Yaruiwo asür Eno. Isak Chishi Swu nem tetushi agüja Dimapur Naga Students’ Union (DNSU)-i parnok telongtet nung aliba shisaliok reju ajak June 30, 2016 nü shibangtsü atema tetuyuba agütsüogo.
Ano, Dimapur Chamber of Commerce & Industries (DCCI)-ia tanga sangdong ka nung, asür Isak Chishi Swu nem tetushi agüja Dimapur nung June 30, 2016 anepdang 6:00 ako nungi nikongtsütsü 6:00 ako tashi shishilembadak ajak shibangtsü atema mepishia metetdaktsü.
Brihostibar nikongtsütsü 2:00 ako meta special chartered flight ka ajanga NSCN/GPRN chairman/ yaruiwo, asür Isak Chishi Swu indang mang Dimapur tonga bener arutsü.
Tayimtsü anendak Naga nunger lennir asür Isak Chishi Swu mang agizükba sülen, Agri Expo-i bener oa idakji public memorial service ka agitsü aser idak nungjagi pa mang central headquarter Hebron-i bener aotsü.
July 1, 2016 anepdang 8:00 ako nung Hebron nung State funeral agitsü aser iba sülen pa tasoyimi bener aotsü. Asür Isak mang Chishilimi yimtsüngi bener aodang, Kohima, Tseminyu – Pughoboto Junction aser Poghuboto jila nung anenzüktsü aser tatemsa July 2, 2016 anepdang 11:00 ako nung Chishilimi yimtsüng nung pa den tatembangba asüpila sentong agir mang aremtsü.
Naga Hoho aser ENPO kübok Naga nunger mulungtet teloktem, Naga kin balala tongti teloktem, Naga yimten telok ajak, yimten teloktem, Naga nunger aser temeimertem ajak Naga nunger lennir asür Isak Chishi Swu den public memorial condolence service nung arua adentsü mepishia metetdaktsür, ta Naga Hoho General Secretary, Mutsikhoyo Yhobu-ia sangdong ka nung metetdaktsü.
June 30, 2016 nikongtsütsü 2:00 ako nung Agri-Expo, Dimapur nung NSCN Yaruiwo (Chairman) asür Isak Chishi Swu den public memorial condolence service agitsü, ta sangdong nungsa shia lir.
NSCN (IM) Yaruiwo Wb. Isak Chisi Swu asüba atema kija aser telok balalai sangdong balala ajanga asüku osang lemsatepogo.
Nagaland & Assam Angh, PB Acharya-i anir, Nagaland nungi Rajya Sabha MP, KG. Kenye, taoba Nagaland Chief Secretary & taoba Naga Interlocutor R.S. Pandey, Central Nagaland Tribes Council, Tenyimi Peoples’ Organisation (TPO), Media Cell ACAUT Nagaland, Ao National Worker Union NSCN/GPRN, Dimapur Naga Students’ Union (DNSU), Er. Levi Rengma aser Sumi Officers’ Union Nagaland nungeri sangdong balala ajanga asür Wb. Isak Chisi Swu asüba atema asüku lemsatepba den pa nem tetushi agütsüogo.

Anogo tenetnü mangyimtsü
Akhümtsübua aliba Nagalim nung Yaruiwo asür Isak Chishi Swu nem tetushi agüja, June 28, 2016 nungi July 4, 2016 tashi Nagalim ajunga nung anogo tenetnü mangyima amungtsü, ta GPRN Cabinet Secretary, D. G. Robert-i sangdong ka nung metetdaktsü.
Iba mangyimba mapang sorkar office ajak nung aser ketdangsertem ki ajak nung Linük wako tongshi tom nung mesangtsü aser official entertainment kecha malitsü, ta GPRN Cabinet Secretary sangdong nungsa shia lir.