NSCN(IM)-i pei sasa yimsü asütsü aser tanga onüktem agienogo: Rijiju

Guwahati, Rongchii (April) 7 (Agencies): NSCN(IM)-i takhangba agütsübatem nungi pei sasa yimsü asütsüba aser tanga tongtipang onük kar agienogo ta Union MoS for Home, Kiren Rijiju-i tanü ashi.
Paisa ashiba agi, yimjung olemtep nung adenba ULFA teloki takhangba agütsübatem ajak Centre-i agizükogo.
Naga yimten latetba ajanga state shinga indang arrtsü nung mekongshitsü, ta Rijiju-isa shisem.
NSCN(IM) den tang tejembidak ken o ya ‘political’ lir aser iba ajanga litsü nung mekongshitsü, ta pai ashi.
“Onoki kanga dang jangjajangja olemtep liyonga arudar. Naga nunger putiotsü balaka asübaji agizüktsü aser onoki telemtetba tajung ka agitsü. Iba sorkar kümsük matemdangsa telemtetba ka agitsü ta Prime Minister-i shiogo” ta Rijiju-isa metetdaktsü.
ULFA den yimjung olemtep aliba atema Rijiju-isa ashiba agi, iba ken o tatembanglen kati arudar aser kobi melii telemtetba ka agitsü.
ULFA-i takhangba agütsüba onüktem nung tashishitsü kecha mali aser Centre sorkari itemji agizükogo, ta paisa shisem.
“Tangartemi North east state tem nung khuret bentsür arutsü atema meranger. Onoki item telokji meteta lir aser parnok tsüngsü sülen anidakdar. Linük anema inyakba putetra ozüng tesashi agi merenshitsü. Onoki intelligence mechanism ka tenzükogo aser parnoki mapa kanga junga inyakdar” ta Union MoS for Home-isa ashi.
Meghalaya Chief Minister, Conrad Sangma-i Centre dang Bangladesh nunger nem work permit agütsütsü atema asüngdangba atema Rijiju-i, “linük inyaksangshi nung lendong bener arutsü atema sorkari telemtetba kecha magitsü” ta ashi.
“Iba tebilemba nung tajung kar dena lir aser onoki shisadangdar, saka kechi telemtetba agidir agiaka linük asoshi lendong bener marutsüsa dang agitsü. Ozüng alema aruba khuret tamajungba mekümdaktsütsü atema onoki inyaktsü” ta paisa shisem.